‘E doja më shumë, ai kishte…’ Berisha zbulon sekretin për Fatos Nanon

Në një intervistë të rrallë për emisionin “FLET” në Top Channel me gazetaren Ilnisa Agolli, lideri historik i së djathtës shqiptare, Sali Berisha, ka bërë një deklaratë të pazakontë duke lavdëruar ish-kundërshtarin e tij politik, Fatos Nano.

I njohur për qëndrimet e forta dhe përplasjet e ashpra me kundërshtarët, Berisha këtë herë befasoi me tonin e tij të moderuar dhe reflektues. Duke folur për momentet kyçe të tranzicionit politik në Shqipëri, ai solli në vëmendje sjelljen e Nanos pas humbjes së zgjedhjeve, të cilin e cilësoi si një akt burrërie dhe përgjegjësie politike.

“Edhe pse ishim kundërshtarë të vendosur, Fatos Nano kishte një cilësi që shumë sot nuk e kanë. E pranonte humbjen, e pranonte gabimin dhe nuk ngulte këmbë kur e kuptonte që kishte mbaruar koha e tij. Ai dha dorëheqjen dhe u tërhoq vetë. Kjo është për t’u vlerësuar, sepse tregoi karakter,” u shpreh Berisha.

Ilnisa Agolli, e cila njihet për pyetjet e saj të drejtpërdrejta, nuk ngurroi të ngacmojë Berishën edhe për aktualitetin politik, por ishte pikërisht ky reflektim për një nga figurat më të përfolura të së majtës që krijoi jehonë më të madhe në studio.

“Kemi shumë dallime me Nanon, por ai nuk fshihej pas justifikimeve. E thoshte me gojën e tij: ‘E bëra gabimin’. Tani e ke të pamundur të gjesh një lider që e thotë këtë gjë”, shtoi Berisha, duke lënë të nënkuptohet se në politikën e sotme mungon ndershmëria për të pranuar përgjegjësinë.

Deklarata e Berishës për Nanon është ndër të rrallat ku ish-kryeministri flet me respekt për një rival politik, dhe menjëherë ka ngjallur komente në rrjet, sidomos në një kohë kur skena politike shqiptare mbetet e tensionuar dhe e polarizuar. Kjo intervistë në “FLET” pritet të komentohet gjatë në ditët në vijim.