Çka janë raketat “Fattah”, për të cilat Irani po thotë se i ka përdorur kundër Izraelit?

Agjencia gjysmëzyrtare e lajmeve Mehr e Iranit pretendon se Irani ka lëshuar raketa Fattah në drejtim të Izraelit.

Siç raporton ky medium, Korpusi i Gardës së Revolucionit Islamik (IRGC) thotë se Irani i ka dërguar një mesazh SHBA’së, duke goditur objektivat izraelite me një raketë të avancuar.

“Sulmi me raketa i sotëm tregoi se kemi arritur kontroll të plotë mbi qiellin e territoreve të pushtuara, banorët e të cilave janë bërë absolutisht të pambrojtur kundër sulmeve raketore të Iranit”, citohet të ketë thënë IRGC.

Megjithatë, CNN raporton se s’ka arritur të konfirmojë këto pretendime.

Çka janë raketat “Fattah”?

Vitin e kaluar, një medium iranian raportoi se Teherani përdori një raketë të re, Fattah-1, në sulmet e tyre ndaj Izraelit në atë kohë.

Teherani e përshkruante Fattah-1 si një raketë “hipersonike” – që do të thotë se udhëton me Mach 5, ose pesë herë shpejtësinë e zërit (rreth 6,100 kilometra në orë), përcjell Insajderi.

Por, analistët e luftës theksuan se pothuajse të gjitha raketat balistike arrijnë shpejtësi hipersonike gjatë fluturimeve të tyre, veçanërisht kur afrohen drejt objektivave të tyre.

Fabian Hinz, studiues në Institutin Ndërkombëtar për Studime Strategjike, i cili shkroi mbi këtë temë, tha se Fattah-1 duket se ka një kokë në një “mjet të manovrueshëm rihyrës”, i cili i mundëson asaj të bëjë rregullime për të shmangur mbrojtjen nga raketat gjatë një pjese të shkurtër të afrimit të saj drejt objektivit.

Raketa Fattah u bë publike për herë të parë në vitin 2023 dhe u emërtua nga Udhëheqësi Suprem i Iranit, Ajatollah Ali Khamenei.

Autoritetet e kanë përshkruar raketën Fattah-1 si të projektuar për të kaluar edhe sistemet më të përparuara të mbrojtjes nga raketat, si Iron Dome dhe Arrow të Izraelit.

Raketa është 12 metra e gjatë dhe ka një rreze veprimi deri në 1,400 kilometra. Ajo funksionon me lëndë djegëse të ngurtë duke përdorur një sistem shtytës me një fazë dhe mund të mbajë 200 kilogramë eksplozivë, sipas një raporti nga Iran Watch.

Termi “hipersonik” përdoret shpesh për t’iu referuar mjeteve dhe raketave hipersonike. Ato janë armë të përparuara dhe mund të manovrojnë në mes të fluturimit me shpejtësi hipersonike brenda atmosferës së Tokës, gjë që e bën shumë të vështirë gjurmimin dhe kapjen e tyre.

Raketat hipersonike udhëtojnë me Mach 5, ose pesë herë shpejtësinë e zërit (6,100 kilometra në orë). /Insajderi.org/