Tronditet bota e futbollit, futbollisti ndërron jetë pas ndërhyrjes kirurgjikale në gju

Bota e futbollit argjentinas është tronditur nga lajmi i papritur i ndarjes nga jeta të mesfushorit të ri Kamilo Nuin, vetëm 18 vjeç. Talenti i ri i futbollit humbi jetën tragjikisht gjatë një ndërhyrjeje kirurgjikale në gju.

Klubi i tij, San Telmo, konfirmoi lajmin e dhimbshëm mbrëmjen e së mërkurës, duke njoftuar se lojtari i ri po i nënshtrohej një operacioni rutinë në Clínica Espora në Adrogué, Buenos Aires. Ndërhyrja kirurgjikale kishte si qëllim trajtimin e dëmtimeve në menisk dhe ligamentin e kryqëzuar, një procedurë e zakonshme kjo për sportistët profesionistë.

Shkaqet e sakta të vdekjes së papritur të Kamilo Nuin nuk janë bërë ende të ditura për publikun. Autoritetet kompetente në Argjentinë kanë nisur një hetim të plotë për të zbardhur të gjitha rrethanat që çuan në këtë tragjedi të paprecedentë në botën e sportit.

Në një deklaratë zyrtare të publikuar nga klubi, San Telmo shprehu hidhërimin e thellë për humbjen e lojtarit të tyre të ri. “SAN TELMO NË ZI. Me hidhërim të thellë, ju njoftojmë për ndarjen nga jeta të Kamilo Ernesto Nuin, një lojtar nga Divizionet tona të të Rinjve dhe ekipi rezervë. Klubi do të qendrojë i mbyllur gjatë ditës në shenjë zie. Ne qendrojmë pranë familjes, miqve dhe shokëve të ekipit në këtë moment të vështirë.”

Kamilo Nuin ishte një pjesë e vlefshme e klubit San Telmo që nga viti 2022. Para kësaj periudhe, ai kishte kaluar nëpër akademitë e njohura të futbollit argjentinas si Boka Zhuniors dhe Independiente, ku kishte arritur të grumbullonte mbi 80 paraqitje me ekipet e të rinjve, duke treguar potencialin e tij të madh në fushën e lojës.

Homazhe dhe mesazhe ngushëllimi për të riun kanë ardhur nga e gjithë bota e futbollit, duke përfshirë edhe Shoqatën e Futbollit Argjentinas (AFA). Nëpërmjet një deklarate zyrtare, AFA shprehu hidhërimin e saj për vdekjen e Kamilo Nuin dhe i shprehu ngushëllimet më të sinqerta familjes së lojtarit në këtë kohë të vështirë.

San Telmo, i cili ka selinë në Buenos Aires, është një klub i njohur që garon në divizionin e dytë të futbollit argjentinas. Vdekja e papritur e Kamilo Nuin ka lënë një boshllëk të madh në klub dhe në komunitetin e futbollit argjentinas, duke treguar edhe një herë brishtësinë e jetës dhe tragjeditë që mund të ndodhin edhe në kontekste sportive.