Në vend të qumështit hedhin ujë (Tregim edukativ)

A jeni edhe ju nga ata që në vend të qumështit hedhin ujë?

Tregohet se në një fshat kishte rënë uria, andaj plaku i fshatit u dha një detyrë të pazakontë të gjithë banorëve të atij fshati, në mënyrë që të përballeshin me thatësirën dhe urinë… Ai i njoftoi se do të vendoste në mes të fshatit një kazan të madh dhe se çdo burrë dhe grua duhet të hedhë në kazan një gotë me qumësht, me kusht që secili ta hedhë gotën vetë dhe që askush të mos e shohë. Njerëzit u ngutën për të përmbushur urdhrin e plakut të fshatit – të gjithë fshiheshin natën dhe derdhnin përmbajtjen e gotës që kishin sjellë. Në mëngjes, plaku e hapi kazanin… dhe çfarë pa??? Kazani ishte plot me ujë!!! Ku është qumështi? Pse secili banor kishte hedhur ujë në vend të qumështit? Secili kishte menduar me vete: “Nëse unë hedh një gotë ujë, kjo nuk do të ndikojë në sasinë e madhe të qumështit që do të hedhin të tjerët.” Kështu, të gjithë u mbështetën te të tjerët, dhe secili mendoi në të njëjtën mënyrë si të tjerët – se vetëm ai kishte hedhur ujë në vend të qumështit. Rezultati i kësaj ishte që uria e goditi këtë fshat dhe ata nuk gjetën rrugëdalje nga kriza.

A e di që edhe ti je ai që mbush gotat me ujë në kohët më të vështira – kur kërkohet prej teje t’i mbushësh me qumësht?

Kur nuk i ndihmon vëllezërve të tu të zbathur, të zhveshur, të uritur, ndërsa ti kënaqesh me një qese çipsa apo një gotë Coca-Cola duke u arsyetuar se ajo që bën ti nuk ka ndikim – ti po mbush gotën me ujë.