Bajrami: Të hënën do t’i drejtohemi ZRRE-së, deputetët e VV-së nuk u nënshkruan

Deputetja e LDK-së, Hykmete Bajrami, ka thënë se të hënën do t’i drejtohen Zyrës së Rregullatorit të Energjisë për anulimin e dy vendimeve, për çka edhe mblodhi nënshkrime në Kuvend, gjatë seancës së sotme.

Bajrami tha se ka pasur përpjekje që për këtë çështje të merren nënshkrime edhe nga deputetët e VV-së, por që këta të fundit nuk kanë pranuar të nënshkruajnë.

Ajo ka theksuar se rreth 200 kompani kanë kërkuar të marrin oferta, por kanë marrë vetëm një nga KESCO, operatori që aktualisht i furnizon ato.

Sipas saj, në Kosovë nuk ka treg të lirë dhe oferta që u është dhënë kompanive është rreth 260 për qind më e shtrenjtë.

“Dehari nuk na dha as fjalën që të shprehemi në Kuvend, por si LDK, ne nuk i kemi votat për ndryshimin e mënyrës së votimit. Sot kemi mbledhur nënshkrimet e disa deputetëve dhe do të vazhdojmë t’i marrim edhe disa të tjerë. Të hënën do t’i drejtohemi Zyrës së ZRRE-së për anulimin e dy vendimeve. Rreth 200 kompani kanë kërkuar të marrin oferta, por kanë marrë vetëm një ofertë nga KESCO – operatori që aktualisht i furnizon ato. Nuk ka treg të lirë në Kosovë. Duhet të ndodhë anulimi i këtij vendimi, pasi oferta nga KESCO është rreth 260 për qind më e shtrenjtë”, tha ajo.