Goditet rrjeti i kontrabandës – Sekuestrohen 7.65 tonë vajra motorike, dyshohet se janë me prejardhje nga Irani

Policia e Kosovës ka zbuluar dhe sekuestruar rreth 7.65 tonë vajra motorike në një depo private. Sipas hetimeve të para, dyshohet se produktet janë kontrabanduar nga Maqedonia e Veriut dhe kanë prejardhje nga Irani. Vlera e vlerësuar e mallit të sekuestruar kap shifrën mbi 25,000 euro, shkruan Insajderi.

Sasia e vajrave është transportuar në terminalin doganor për t’u nënshtruar procedurave të mëtejshme administrative dhe hetimore. Rasti është duke u trajtuar nga Njësia e Hetimeve Rajonale e Doganës së Kosovës – DRK Lindje, e cila është duke punuar për identifikimin dhe ndjekjen penale të të gjithë personave të përfshirë në këtë aktivitet të kundërligjshëm.

Policia e Kosovës, në bashkëpunim me autoritetet tjera shtetërore, ka theksuar përkushtimin për të luftuar kontrabandën dhe veprimtaritë ilegale, sidomos në zonat kufitare që shpesh përdoren për rrugë të paligjshme të furnizimit.