Kur Evropa vetëndihet Ukrainë

Evropa duhet të marrë të gjitha mjetet për t’u mbrojtur kundër agresionit ushtarak, tha Presidenti i Këshillit Evropian, Antonioil Costa, duke shtuar se “paqja është mbrojtje”.

“Nëse Rusia i konsideron kufijtë e Ukrainës si vija në hartë, pse duhet të respektojë kufijtë e ndonjë vendi tjetër?”, tha ai në një mbledhje të Qendrës së Politikave Evropiane në Bruksel.

Ai shtoi se tani është e qartë se mënyra më e mirë për të mbrojtur aleancën transatlantike është forcimi i shtyllës evropiane të NATO-s, duke u bërë më autonome, më sovrane dhe më pak e varur nga të tjerët, veçanërisht nga SHBA.

Rritja e shpenzimeve të mbrojtjes

Evropa po rrit në mënyrë dramatike shpenzimet e mbrojtjes për shkak të shqetësimeve se Shtetet e Bashkuara, të cilat kanë garantuar sigurinë e Evropës që nga fundi i Luftës së Dytë Botërore, nuk janë më të gatshme ta bëjnë këtë pasi e zhvendosin fokusin e saj në Indo-Paqësorin.

Më 6 mars të këtij viti, liderët e 27 vendeve të Bashkimit Evropian i dhanë dritën jeshile planit të Komisionit Evropian për forcimin e mbrojtjes.

Presidentja e Komisionit Evropian Ursula von der Leyen ka propozuar një plan të quajtur “Riarmatosja e Evropës”, i cili synon të mobilizojë rreth 800 miliardë euro, përfshirë 150 miliardë kredi, për të forcuar aftësitë mbrojtëse të kontinentit. /tesheshi.com/