Pas humbjes në Helsinki, kuqezinjtë kërkojnë reagimin përpara tifozëve të tyre në “Arenën Kombëtare”.

Ismajli pritet të flasë për gjendjen e skuadrës, atmosferën në grup, mësimet e nxjerra nga ndeshja e parë dhe rëndësinë e marrjes së një rezultati pozitiv në këtë sfidë.

Ndeshjet:

“Jemi përgatitur shumë mirë dhe e dimë rëndësinë e kësaj ndeshjeje. Normalisht, kemi si qëllim dhe detyrim vendin e parë. Jemi një skuadër me më shumë cilësi se të gjitha ekipet e tjera të grupit tonë, por këtë duhet ta tregojmë në fushë. Në ndeshjen e parë kemi luajtur shumë mirë, por episodet bëjnë të tyren dhe kështu ajo ndeshje shkoi siç shkoi.”

Gabimet:

“Keni të drejtë. Në ndeshjen e parë pësuam dy gola nga dy goditje standarde. Ndonjëherë fati të kthen shpinën, pasi ne patëm rastet tona, por nuk arritëm t’i shfrytëzonim. Duke pasur parasysh se kundërshtarët kanë goditës shumë të mirë, duhet të shmangim faullet në afërsi të zonës sonë.”

Tifozët:

“Nuk mund të them se djemtë kanë stres apo panik kur luajnë përpara tifozëve tanë. Ata janë lojtari i 12-të për ne dhe mund të themi se këtu kemi arritur gjithmonë rezultate shumë të mira. Edhe në ndeshjen ndaj San Marinos na mbështetën shumë dhe ne arritëm të fitonim. Ndonjëherë rëndësi ka fitorja, jo mënyra se si luan, dhe në atë ndeshje mbështetja e tifozëve na ndihmoi shumë.”

Sylvinho-Maran:

“Unë besoj se mbrojtja më e mirë është sulmi. Sylvinho ka praktikuar një futboll shumë mbrojtës dhe statik, por ky futboll nuk ekziston më. Futbolli modern është ai që po aplikon sot Maran, pasi duhet t’i bësh presion kundërshtarit për ta detyruar të gabojë. Ne kemi lojtarë që janë të aftë të luajnë një kundër një dhe kemi mundësitë për ta bërë këtë. Nëse qëndrojmë shumë prapa, gjithçka bëhet më e vështirë.”

Në kuadër të raundit të dytë kualifikues për Kampionatin Evropian 2027, Maqedonia do të jetë nikoqire e këtij turnezi madhështor që do të zhvillohet në Turnovë dhe Strumicë nga 9 deri më 17 nëntor 2026, të cilët do të kërkojnë maksimumin në përballjet e zjarrta ndaj Irlandës së Veriut, Sllovenisë dhe Maltës (më 11, 14 dhe 17 nëntor).
Për Kasamin, i cili spikat si një nga lojtarët që po ndërton karrierë jashtë vendit, ky grumbullim është fryti i punës së palodhur, sakrificës dhe ritmit të shkëlqyer të rritjes.
Kjo ftesë për Lavdrim Kasamin, përfaqëson një tjetër mundësi të vlefshme për të bërë hapa përpara, për të fituar përvojë ndërkombëtare dhe për të dëshmuar potencialin e tij në skenën evropiane. Një kapitull i ri në karrierën e një futbollisti të ri, që synon të vazhdojë të ecë përpara.

Një vendim që rikthen kujtimet e një kohe tjetër dhe krijon një urë më të drejtpërdrejtë mes Kombëtares dhe njerëzve që e mbështesin.

Ka vendime që në pamje të parë duken të vogla, por që për tifozët kanë një domethënie shumë më të madhe. Një prej tyre është ai i Rolando Maran, i cili ka vendosur të hapë dyert e Kombëtares shqiptare për publikun. Sot, në orën 16:00, në Shtëpinë e Futbollit, tifozët do të kenë mundësinë të ndjekin nga afër një seancë stërvitore të kuqezinjve, në prag të përballjes vendimtare me Finlandën.

Për shumëkënd, kjo mund të jetë thjesht një stërvitje e zakonshme. Por për futbollin shqiptar është edhe rikthimi i një tradite që prej vitesh ishte zhdukur nga rutina e ekipit kombëtar. Dikur, në epokën e trajnerëve shqiptarë, dyert e stërvitjes ishin të hapura. Tifozët mund të afroheshin, të shihnin idhujt e tyre në fushë dhe të ndienin se ishin pjesë e përditshmërisë së Kombëtares. Ishte një kontakt i drejtpërdrejtë mes ekipit dhe publikut, një mënyrë për ta përjetuar fanellën kuqezi edhe përtej 90 minutave të ndeshjes.

Por kjo marrëdhënie ndryshoi me ardhjen e trajnerëve të huaj. Sidomos nga viti 2022, seancat stërvitore u kthyen kryesisht në ambiente të rezervuara për skuadrën. Një praktikë e lidhur me modelet perëndimore të punës, ku privatësia, përqendrimi i futbollistëve dhe përgatitja taktike konsiderohen elemente të rëndësishme të procesit.

Tashmë, Rolando Maran zgjedh të bëjë një hap drejt tifozëve. Nuk bëhet fjalë për një ndryshim të të gjithë filozofisë së punës, por për një gjest që tregon se profesionalizmi dhe afërsia me publikun nuk janë domosdoshmërisht në kundërshtim me njëri-tjetrin.

Madje, momenti i zgjedhur e bën këtë vendim edhe më domethënës. Shqipëria është në prag të një sfide me shumë rëndësi ndaj Finlandës dhe mbështetja e tifozëve mund të shërbejë si një shtysë shtesë për skuadrën.

Sot, në orën 16:00, Shtëpia e Futbollit nuk do të jetë vetëm vendi ku kuqezinjtë përgatiten për ndeshjen e radhës. Për disa orë, ajo do të kthehet edhe në një hapësirë takimi mes Kombëtares dhe tifozëve të saj. Një derë që për shumë vite qëndroi e mbyllur, sot hapet sërish. Dhe ndonjëherë, për të fituar zemrat e tifozëve, nuk nevojitet një gol, por thjesht t’i lejosh të jenë më pranë skuadrës së tyre. /TCH/

Skuadra e drejtuar nga Francesco Farioli siguroi kështu fitoren e parë në fazën e ligës së Champions League, ndërsa Napoli i Massimiliano Allegrit pësoi një tjetër goditje në aventurën europiane.
Ndeshja e transmetuar drejtpërsëdrejti në Top Channel nisu me ritëm të lartë dhe vendasit kaluan në avantazh që në minutën e 11-të. Pas një krosimi në zonë, Jan Bednarek u shkëput mbi mbrojtësit kundërshtarë dhe me një goditje të saktë me kokë mposhti Alex Meret.

Napoli u përpoq të reagonte dhe në minutën e 38-të Kevin De Bruyne dërgoi topin në rrjetë, por goli u anulua për pozicion jashtë loje.
Megjithatë, këmbëngulja e miqve u shpërblye në minutën e 43-të. Rasmus Højlund provoi të mposhtte Diogo Costën, portieri portugez e ndali goditjen e parë, por topi përfundoi te Scott McTominay, i cili nuk gaboi dhe vendosi baraspeshën 1-1.

Në pjesën e dytë, Porto u rikthye më kërkuese dhe arriti të marrë sërish kontrollin e rezultatit. Në minutën e 71-të, Gabri Veiga përfitoi nga një top i marrë në zonë dhe, i vetëm përballë Meret, e dërgoi topin në rrjetë për 2-1.
Vetëm nëntë minuta më vonë, vendasit goditën sërish. Pas një goditjeje nga këndi, Jakub Kiwior u ngrit mbi mbrojtjen napolitane dhe me kokë shënoi golin e tretë, duke afruar Porton me një fitore të rëndësishme.

Drama u kompletua në minutat e fundit. Në minutën e 88-të, Rafa Martin pengoi Samu në zonë dhe gjyqtari akordoi penallti, duke e ndëshkuar gjithashtu me karton të kuq. Nga pika e bardhë u paraqit vetë Samu, i cili në minutën e 90-të vulosi rezultatin përfundimtar 4-1.

Një triumf bindës për Porton, që pas rezultateve zhgënjyese në ndeshjet e para gjen më në fund fitoren në Champions League.
Në krahun tjetër, Napoli largohet nga Portugalia me një humbje të rëndë, ndërsa skuadra e Allegrit duhet të reflektojë pas një mbrëmjeje ku mbrojtja u ndëshkua katër herë.

Universiada do të mbahet më 19, 20 dhe 21 nëntor 2026, në Shkup, ndërsa aktivitetet sportive do të zhvillohen në palestrën sportive „Shaban Trstena“.

Në këtë ngjarje do të marrin pjesë shtatë institucione të arsimit të lartë nga trojet shqiptare: Universiteti „Nënë Tereza“ në Shkup, Universiteti „Ismail Qemali“ në Vlorë, Universiteti i Tiranës, Universiteti i Prishtinës, Kolegji AAB, Universiteti i Tetovës dhe Universiteti i Evropës Juglindore.

Përveç garave sportive, Universiada synon të krijojë hapësira të reja për njohje, shkëmbim përvojash dhe bashkëpunim ndërmjet studentëve, duke dëshmuar se sporti është një urë e rëndësishme bashkimi.

Këshilli organizativ po punon për përgatitjen e të gjitha detajeve, në mënyrë që kjo ngjarje të zhvillohet me sukses dhe të kthehet në një festë të vërtetë të sportit dhe akademisë.

Informacione të tjera rreth programit, garave dhe organizimit të Universiadës Mbarëkombëtare – Çair 2026, do të bëhen të ditura gjatë ditëve në vijim.

Vota e Kosovës për “Topin e Artë” ka rezervuar disa zgjedhje interesante, duke vendosur në krye pikërisht futbollistin që fitoi trofeun e këtij viti, Harry Kane. Gazetari që përfaqësoi Kosovën në votim e renditi sulmuesin anglez në vendin e parë, përpara disa prej emrave më të mëdhenj të futbollit botëror.

Në vendin e dytë u pozicionua Kylian Mbappé, ndërsa surpriza e podiumit është Khvicha Kvaratskhelia, i cili zuri vendin e tretë, përpara Ousmane Dembélé. Francezi, fitues i edicionit të kaluar sipas renditjes së këtij viti, u rendit i katërti në votën kosovare.

Lista vijon me Ferran Torres në vendin e pestë dhe Erling Haaland në të gjashtin. Lamine Yamal, një nga emrat më të përfolur të futbollit europian, u pozicionua vetëm në vendin e shtatë, ndërsa Vinícius Jr. renditet i teti. Dhjetëshen e plotë e mbyllin João Neves në vendin e nëntë dhe Pau Cubarsí në të dhjetin.

Renditja e plotë e votimit nga Kosova:

1. Harry Kane
2. Kylian Mbappé
3. Khvicha Kvaratskhelia
4. Ousmane Dembélé
5. Ferran Torres
6. Erling Haaland
7. Lamine Yamal
8. Vinícius Jr.
9. João Neves
10. Pau Cubarsí

Ndërkohë, më herët është bërë e ditur edhe vota e Shqipërisë për “Topin e Artë”, ku gazetari i njohur Besnik Dizdari bëri përzgjedhjet e tij për futbollistët më të mirë në botë. Dy votimet nga Kosova dhe Shqipëria sjellin një tjetër këndvështrim mbi mënyrën se si gazetarët e rajonit vlerësuan yjet e futbollit botëror.

Aktualisht, ai është pjesë e FC Euromilk GL, ndërsa më parë ka qenë pjesë e FC Vardar. Gjithashtu, Abdula është pjesë e Përfaqësueses U19 të Maqedonisë së Veriut, një hap i rëndësishëm në zhvillimin e karrierës së tij futbollistike.

Sezonin 2025/26, Admin Abdula e përfundoi me statistika mbresëlënëse, duke regjistruar 33 paraqitje, 29 gola dhe 14 asistime. Këto shifra dëshmojnë për kontributin e tij në repartin ofensiv dhe potencialin për të ecur përpara në karrierën e tij.

Në sezonin aktual 2026/27, ai ka regjistruar deri më tani katër paraqitje, ndërsa synon të vazhdojë zhvillimin dhe të kontribuojë edhe më shumë për skuadrën e tij.

Me përkushtim, talent dhe ambicie, Admin Abdula synon të bëjë hapa të rëndësishëm në futboll dhe të ndërtojë një të ardhme të suksesshme në këtë sport.

Në ndeshjen e zhvilluar në Rrogozhinë, vendasit e morën shpejt kontrollin e lojës dhe kaluan në avantazh që në minutën e 9-të, me Alessandro Albanesse. Egnatia vijoi të diktonte ritmin e takimit dhe, në minutën e 41-të, Danjel Adjessa shënoi golin e dytë, duke i dhënë skuadrës së tij një avantazh të rëndësishëm përpara pushimit.

Pas rikthimit në fushë, Vllaznia reagoi dhe arriti të ngushtonte diferencën në minutën e 59-të, kur Daniel Perez dërgoi topin në rrjetë. Goli rriti shpresat e shkodranëve për t’u rikthyer në lojë, por Egnatia ruajti qetësinë dhe vijoi të kërkonte golin e sigurisë. Përpjekjet e vendasve u shpërblyen në minutën e 86-të, kur Ilir Gruda shënoi golin e tretë, duke vulosur fitoren 3-1.

Me këtë sukses, Egnatia ngjitet në kuotën e 18 pikëve dhe ruan vendin e dytë, vetëm një pikë larg Teutës kryesuese. Në krahun tjetër, Vllaznia mbetet në vendin e parafundit me pesë pikë, një më shumë se Partizani, që mbyll klasifikimin.

Në reagimin e tij, sulmuesi shqiptar thekson se studentët përfaqësojnë të ardhmen e vendit dhe meritojnë të dëgjohen e të trajtohen me dinjitet. Sipas Manajt, dhuna ndaj tyre është e papranueshme, veçanërisht kur vjen nga ata që kanë për detyrë të mbrojnë qytetarët.

Futbollisti nënvizon se çdo qytetar ka të drejtë të ngrejë zërin për një të ardhme më të mirë, paga më të drejta, pensione dinjitoze dhe kushte jetese më të përballueshme.

“Zëri i qytetarëve duhet dëgjuar, jo të mbytet me dhunë”, është mesazhi që përcjell Manaj, duke kërkuar që shqetësimet e qytetarëve të merren seriozisht.

Megjithatë, sulmuesi i Kombëtares u bën thirrje edhe protestuesve që të ruajnë karakterin paqësor të tubimeve dhe të mos dëmtojnë pronën private. Sipas tij, protesta duhet të zhvillohet me dinjitet dhe pa u shndërruar në përplasje apo dhunë.

Manaj sqaron se reagimi i tij nuk është në mbështetje të ndonjë pale politike, por një mesazh si shqiptar që dëshiron një vend ku të rinjtë të kenë perspektivë, qytetarët të jetojnë me dinjitet dhe askush të mos ketë frikë të shprehë mendimin e tij.

Në përfundim, futbollisti bën thirrje për mbrojtjen e studentëve, respektimin e qytetarëve dhe ndalimin e dhunës, duke theksuar se e ardhmja e Shqipërisë meriton më shumë.

Përmes një kumtese zyrtare, klubi njofton se gjyqtari Ilioski ka kontaktuar personalisht kapitenin Besir Demiri, duke i kërkuar falje për incidentin e ndodhur.

Nga Shkëndija Haraçinë 77 e vlerësojnë këtë gjest dhe gatishmërinë e gjyqtarit për të pranuar gabimin, por theksojnë se kërkimfalja nuk mund ta zëvendësojë përgjegjësinë për fyerjet me karakter racist.

“Racizmi dhe diskriminimi nuk kanë vend në futboll, aq më pak kur vijnë nga personat që kanë për detyrë të garantojnë drejtësinë, paanshmërinë dhe respektimin e rregullave në fushën e lojës”, thuhet në reagimin e klubit.

Shkëndija Haraçinë 77 kërkon që institucionet kompetente të futbollit ta shqyrtojnë rastin dhe të ndërmarrin masat përkatëse disiplinore, pavarësisht kërkimfaljes së gjyqtarit.

Klubi thekson se nuk kërkon hakmarrje apo privilegje, por përgjegjësi, respekt dhe trajtim të barabartë për çdo futbollist.

“Për ne, ky nuk është vetëm një incident ndaj kapitenit tonë, por një çështje parimore që prek dinjitetin e çdo sportisti”, përfundon reagimi i KF Shkëndija Haraçinë 77, duke rikujtuar se futbolli duhet të jetë lojë që bashkon dhe jo që ndan.

Sulmuesi i Kombëtares shqiptare ishte protagonist me dy gola në fitoren 4-0 ndaj Antalyasporit, në ndeshjen e vlefshme për javën e 10-të të Ligës së Parë turke.

Futbollisti nga Kumanova zhbllokoi potencialin e tij në minutën e 24-t, kur shfrytëzoi një mundësi brenda zonës dhe dërgoi topin në rrjetë me një goditje të fuqishme.

Seferi nuk u mjaftua me kaq. Në minutën e 53-të, sulmuesi shqiptar realizoi edhe golin e dytë personal, pas një aksioni individual, duke kaluar portierin kundërshtar dhe duke e dërguar topin në portën e boshatisur.

Me këtë dopietë, Seferi e çon në nëntë numrin e golave të realizuar këtë sezon, duke konfirmuar formën e shkëlqyer që po kalon në kampionatin turk. Paraqitjet e tij të fundit tregojnë se sulmuesi kuqezi po gjen vazhdimisht rrugën e rrjetës dhe po luan një rol të rëndësishëm në ecurinë e Kayserisporit.

PSG e mbylli pjesën e parë në avantazhin e tre golave, ndërsa Manchester City u rikthye në lojë pas pushimit, duke kërkuar me ngulm përmbysjen. Erling Haaland shënoi golin e parë për anglezët në minutën e 53-të, me një goditje me kokë pas krosimit të Ndiaye.

Megjithatë, në minutën e 62-të, Akliouche realizoi golin e katërt për PSG-në, duke e çuar rezultatin në 4-1 dhe duke vështirësuar misionin e vendasve.

City nuk u dorëzua dhe vijoi të sulmonte. Haaland goditi traversën në minutën e 74-t, ndërsa vetëm një minutë më vonë shënoi golin e dytë personal, pas asistit të Bouaddi, duke ngushtuar diferencën në 4-2.

Në minutat e fundit, Manchester City kërkoi të shënonte sërish, por mbrojtja e PSG-së dhe portieri Safonov arritën të ruanin avantazhin. PSG arriti të fitojë edhe një penallti në fund, por Torres e gjuan lehtë dhe Donnaruma arrin ta ndalë.

Pas 90 minutash lojë, Paris Saint-Germain merr fitoren 4-2, ndërsa Manchester City nuk arrin të kompletojë përmbysjen, pavarësisht reagimit në pjesën e dytë.

REZULTATI:

Manchester City-PSG 2-4

Haaland 54′, 74′, Akliouche 62’/ Doue 13′, Dembele 15′, Vitinha 31′

Sipas reagimit të televizionit, incidenti ka ndodhur mes Lecit dhe mysafires së emisionit, ish-futbollistes Edonisa Aliu.

Drejtori i Informacionit në TV Dukagjini, Dibran Istrefi, ka bërë të ditur përmes një njoftimi në rrjetin social Facebook, se vendimi është marrë pas shqyrtimit të rrethanave të rastit.

Televizioni ka theksuar se situata të tilla janë të papranueshme, ndërsa ka bërë të ditur se me rastin po merren organet e rendit dhe të drejtësisë.

TV Dukagjini ka shprehur gatishmërinë për bashkëpunim të plotë me organet përkatëse, të cilat pritet të sqarojnë rrethanat e incidentit.

Harun Memedi u shpall kampion Ballkanik në kategorinë U-15, duke zënë vendin e parë dhe duke fituar medaljen e artë.

Në U-15, Abdulaziz Azizi u rendit në vendin e dytë, ndërsa në kategorinë U-17, Miraxh Mustafa përfundoi në vendin e tretë.

Me një medalje të artë, një të argjendtë dhe një të bronztë, mundësit nga Shkupi kanë shënuar paraqitje të suksesshme në garën ballkanike të zhvilluar në Kroaci.

Kurti ka thënë se Kosova luajti më mirë se Austria dhe se rezultati nuk pasqyroi atë që, sipas tij, u pa në fushë.

“Kosova luajti më mirë se Austria. Austria pati më shumë fat se Kosova. Barazimi 1:1 nuk pasqyroi çfarë pamë”, ka shkruar Kurti në Facebook.

Ai ka vlerësuar përkushtimin e futbollistëve kosovarë, duke theksuar se ekipi po përmirësohet dhe se potenciali për të ardhmen është edhe më i madh.

“Duket që janë duke u bërë gjithnjë e më të mirë dhe potenciali në vijim është më i madh sesa niveli që kemi tani. Pati së paku tri shanse të tjera për gol, të tilla që na lanë pa frymë. Mbase 16-metërshi i kundërshtarit, përkatësisht realizimi ynë, do edhe pak më shumë vëmendje e vetëbesim drejt dy ndeshjve të ardhshme në muajin nëntor, me Izraelin dhe Irlandën. Gëzuar Kosovë”, tha kryeministri.

Memorandumi është nënshkruar në Tetovë nga Drejtori Ekzekutiv i KF Shkëndijës, Valdrin Uka, dhe Rektori i Universitetit të Tetovës, Prof. Dr. Kushtrim Ahmeti. Marrëveshja parasheh bashkëpunim në disa fusha, duke nisur nga praktika profesionale e studentëve pranë strukturave të klubit, deri te ligjëratat, seminaret dhe punëtoritë praktike me ekspertë të të dyja institucioneve.

Një fokus i rëndësishëm i marrëveshjes është edhe kërkimi shkencor dhe testimet sportive, ku kapacitetet akademike dhe laboratorike të Universitetit të Tetovës mund të kontribuojnë në monitorimin dhe zhvillimin e performancës së futbollistëve, përgatitjes fizike, rikuperimit dhe metodologjive bashkëkohore të stërvitjes.

Bashkëpunimi hap gjithashtu mundësi për projekte të përbashkëta vendore dhe ndërkombëtare, përfshirë Erasmus+ Sport, organizimin e konferencave dhe aktiviteteve sportive, si dhe mbështetjen e futbollistëve të rinj të Shkëndijës në ndjekjen e studimeve universitare përmes konceptit të karrierës së dyfishtë.

Memorandumi, i cili është i vlefshëm për një periudhë trevjeçare, krijon bazën për iniciativa dhe projekte të reja që mund të konkretizohen në vazhdim, me zhvillimin e sportit, dijes dhe gjeneratave të reja në qendër të këtij bashkëpunimi.

Drejtori sportiv i Kayserisporit, Seyit İçgül, është parë në Prishtinë në një takim me përfaqësues të futbollit kosovar.

Në foto bie në sy fanella e klubit turk, ndërsa në sfond qëndron fanella legjendare me numrin 9, e Fadil Vokrrit.

Ende nuk ka detaje zyrtare për arsyen e takimit, por prania e një drejtuesi të Kayserisporit në Prishtinë ka ngjallur kureshtje, sidomos në një periudhë kur klubet po planifikojnë lëvizjet e tyre për merkaton e ardhshme.

A ka diçka më shumë pas këtij takimi? Mbetet për t’u parë.

Latifi, i cili është zhvilluar në disa klube vendore, tashmë ka arritur të bëjë hapin drejt futbollit profesionist në Kroaci, duke fituar besimin e drejtuesve të klubit.

NK Osijek ka njoftuar se Admir Latifi, Luka Posavec dhe Luka Kolar kanë firmosur kontrata profesionale deri në vitin 2029.

“Tre lojtarët e rinj, të rritur në klubin tonë, me talentin, punën dhe përkushtimin e tyre kanë merituar besimin dhe kanë bërë një hap të rëndësishëm në karrierat e tyre”, thuhet në njoftimin e klubit.

Për Latifin, ky është një tjetër kapitull i rëndësishëm pas paraqitjeve dhe përvojës së tij në disa klube në vend, ndërsa tashmë karrierën do ta vazhdojë në një nivel më të lartë, në futbollin kroat./ZYRTARE.NET/

Nikollovski ishte pjesë e kategorive të reja të FK Teteks, ndërsa dashurinë për klubin e vazhdoi edhe si pjesë e ekipit senior.

„Me pikëllim të madh dhe dhimbje të thellë ndajmë lajmin se më 12.09.2026 e humbëm Danielin. Danieli ishte pjesë e kategorive të reja të FK Teteks, ndërsa dashurinë për klubin e vazhdoi edhe si pjesë e ekipit senior. Do të mbetet i kujtuar si pjesë e familjes sonë të Teteksit dhe përgjithmonë do të jetë pjesë e historisë së klubit“, thuhet në njoftimin e klubit.
FK Teteks i ka shprehur ngushëllimet më të thella familjes, të afërmve dhe të gjithë atyre që e kanë njohur Danielin.
„Prehu në paqe, Daniel. Fluturo lart, engjëll.“

Beqiri ka theksuar se përkrahja e sportit dhe e klubit lokal mbetet një nga prioritetet, duke përcjellë mesazhin për bashkëpunim dhe unitet rreth Shkëndijës.

“Bashkë për sportin, bashkë për Shkëndijën!”, ka shkruar Beqiri.

Në postimin e tij, kryetari i Haraçinës thekson se mbështetja për sportin në komunë duhet të jetë e përbashkët, ndërsa “Çlirimtarët” cilësohen si pjesë e rëndësishme e atmosferës që rrethon klubin.

“Kuadër të bashkëpunimit dhe përkrahjes së sportit në Haraçinë, së bashku me kryetarin e KF Shkëndija e Haraçinës, z. Sulejman Alimi, dolëm në mbështetje të grupit të tifozëve ‘Çlirimtarët’.

Bashkë për sportin, bashkë për Shkëndijën!”, thuhet në postimin e Beqirit.