Lajme Archives - Zyrtare.net

Policia shpërndan protestuesit në Tiranë, boshatiset bulevardi

redaksia2 — Sun, 25 Oct 2026 03:06:10 +0000

Policia ia ka dalë të shpërndajë protestuesit që sonte iu rikthyen akteve të dhunshme. Momentalisht, rrugët e Tiranës janë të boshatisura prej tyre.

Në bulevard, ka nisur pastrimi nga gurët dhe sendet e tjera të forta të hedhura gjatë përplasjes me policinë.

Protestuesi i plagosur sot në sy është tifoz i zjarrtë i kombëtares shqiptare, po operohet në spitalin e Traumës në Tiranë

redaksia2 — Sun, 25 Oct 2026 02:06:15 +0000

Erjon Vishkulli, 28-vjeçari i njohur si një prej tifozëve më të zjarrtë të Kombëtares shqiptare, është një nga të plagosurit rëndë gjatë protestës kombëtare të studentëve dhe të rinjve në Tiranë.

I riu, pjesëtar i grupimit të njohur “Tifozat Kuq e Zi”, ka pësuar një dëmtim të rëndë në zonën e syrit dhe aktualisht ndodhet i shtruar në Spitalin e Traumës.

Sipas raportimeve, Vishkulli i është nënshtruar një ndërhyrjeje kirurgjikale, ndërsa gjendja e tij shëndetësore raportohet e rëndë. Pamjet e publikuara nga protesta treguan 28-vjeçarin me fytyrën e mbuluar nga gjaku, pas plagosjes gjatë përplasjeve mes protestuesve dhe forcave të policisë. Ai u transportua me urgjencë drejt spitalit për të marrë ndihmë të specializuar mjekësore.

Dyshohet se u godit nga një plumb gome

Sipas informacioneve paraprake, i riu dyshohet se është goditur nga një plumb gome i përdorur gjatë ndërhyrjes së policisë për shpërndarjen e protestuesve. Megjithatë, ende nuk ka një konfirmim zyrtar mbi mjetin që ka shkaktuar plagosjen dhe rrethanat e sakta të ngjarjes.

Nga tribunat ku mbështet Kombëtaren, në Spitalin e Traumës

Erjon Vishkulli është një emër i njohur për tifozërinë shqiptare. Prej vitesh ai është pjesë aktive e grupimit “Tifozat Kuq e Zi” dhe njihet si ‘kryetifoz’ i Kombëtares, duke qenë i pranishëm në stadiume për të mbështetur kuqezinjtë. Por këtë herë, 28-vjeçari nuk është në tribunat e stadiumit për të mbështetur Shqipërinë, por në një shtrat spitali, pas plagosjes gjatë protestës në kryeqytet.

Ngjarja është regjistruar në ditën e 12-të të protestës kombëtare të studentëve dhe të rinjve, e cila u shoqërua me përplasje të forta me policinë. Gjatë tubimit u raportua përdorimi i gazit lotsjellës, ujit me presion dhe plumbave të gomës.

Plagosja e Vishkullit është një ndër rastet më të rënda të raportuara gjatë protestës, ndërsa mbeten ende pa përgjigje pyetjet mbi rrethanat e dëmtimit dhe pasojat që mund të ketë për shikimin e tij.

Pritet një informacion zyrtar nga autoritetet shëndetësore për gjendjen e 28-vjeçarit dhe rezultatin e ndërhyrjes kirurgjikale./panorama/

Çfarë ndodhi në 6 orë kaos në Tiranë? Protestuesit e maskuar me molotovë, gurë e flakë kundër institucioneve, bankave dhe bizneseve

redaksia2 — Sun, 25 Oct 2026 01:36:14 +0000

Për më shumë se 6 orë, protestuesit rikthyen kaosin në rrugët e Tiranës, pas tri ditësh që gjendja ishte qetësuar dukshëm. Nën shënjestrën e protestuesve të maskuar u vu edhe Ministria e Infrastrukturës si dhe Bashkia e Tiranës.

Ata i vunë flakën edhe derës së Ministrisë së Bujqësisë, por fatmirësisht flakët janë shuar shpejt, pa lejuar që të përhapeshin në të gjithë godinën. Molotovë u hodhën edhe drejt Teatrit të Kukullave që po ashtu pësoi dëme. Sulme pati edhe ndaj Bankës së Shqipërisë, së cilës i hodhën molotovë dhe thyen disa kamera sigurie. Disa herë protestuesit tentuan të sulmonin me fishekzjarrë edhe selinë e PS.

Rikthimi te aktet e dhunshme përkoi edhe me piketimin e bankave të nivelit të dytë dhe biznesit të një kompanie celulare, të cilave iu thyen xhamat.

Gjatë hedhjes së lëndëve piroteknike, dy efektivë janë lënduar nga flakët në këmbë. Edhe një protestuese u lëndua nga një gur në kokë, e po ashtu një tjetër me fishek gome në afërsi të syrit.

Nën urdhrat e opozitës, protestuesit e maskuar iu kthyen ritualit të ditëve të shkuara të sulmeve me gurë, kapsollë e fishekzjarrë.

Më herët Policia duke përdorur ujë e gaz lotsjellës, zbrazi brenda disa minutash bulevardin “Dëshmorët e Kombit” nga protestuesit e dhunshëm

Skenari i protestuesve i gjeti të gatshëm efektivët që prej përplasjeve të para te Ministria e Arsimit që ndërhynë menjëherë me autobotët që i ndoqën duke hedhur ujë e gaz lotsjellës duke i zhvendosur brenda pak minutash drejt qendrës. Nga aty, u shpërndanë në drejtime të ndryshme dhe shkuan te kryeministria.

Nga ana e policisë, ka pasur edhe përdorim të spray-t me piper dhe fishekëve të gomës.

13 persona të plagosur nga protesta

Probleme në konviktin “Stiv Naumov”: Radiatorë të dëmtuar, alarme të aktivizuara dhe kanalizime të bllokuara

admin — Sun, 25 Oct 2026 01:06:10 +0000

Në konviktin studentor “Stiv Naumov” në Shkup, i cili së fundmi është rinovuar, janë shfaqur sërish probleme që shqetësojnë drejtuesit e institucionit.
Sipas raportimeve, janë dëmtuar radiatorë, janë aktivizuar sistemet e alarmit dhe janë bllokuar kanalizimet.
Këto probleme ngrenë pikëpyetje për ruajtjen dhe mirëmbajtjen e objektit të rinovuar, si dhe për kushtet me të cilat përballen studentët që qëndrojnë aty.

Ben Andoni ngre alarmin për protestat: Rrezikojmë të kalojmë në anarki

redaksia2 — Sat, 24 Oct 2026 23:36:11 +0000

Ben Andoni ngre alarmin për protestat: Rrezikojmë të kalojmë në anarki

Lajme

Gazeta Express24/10/2026 22:27
Analisti Ben Andoni, i ftuar në një intervistë në lidhje të dretpërdrejtë për “Ora News”, ka komentuar protestat në Tiranë, duke i lidhur ato me pakënaqësinë ndaj korrupsionit dhe problemeve të qeverisjes. Sipas tij, protesta është pjesë e një lëvizjeje më të gjerë europiane, ndërsa mbetet e paqartë nëse ajo do të ruajë karakterin rinor apo do të dominohet nga Partia Demokratike.

Andoni u shpreh se korrupsioni dhe problemet e qeverisjes janë ndër faktorët kryesorë që kanë nxitur pakënaqësinë qytetare. Ai theksoi gjithashtu se opozita ka përfituar nga mobilizimi i të rinjve, duke rikuperuar terrenin e humbur gjatë muajve të mëparshëm të protestave.

“Deri tani them që është një gjysmë anarki, por kam frikë se do kalojmë në një anarki dhe do duhet pastaj vetëm ndërhyrja e të huajve që të vendosin diçka në vijë”, u shpreh ai.

Ben Andoni:E para është pjesë e një revolte paneuropiane që po bëhet ndaj enturazheve politike. Por në Shqipëri lidhet edhe me korrupsionin shumë të madh. Unë besoj se vetë zoti Rama ka arritur ta kuptojë tashmë që karburanti i tyre është korrupsioni dhe janë probleme të shumë të mëdha qeverisëse të tij. Dhe jo më pak, ju e dini që pak orë më përpara i ka kërkuar dorëheqjen e një pjese të madhe të drejtorëve kryesorë të administratës së vet.

Ndërsa, përsa i përket tashmë revoltës dhe pjesës stratigrafike të saj, po them që jemi ende herët për të marrë vesh realisht çfarë janë. Kuptohet që tani peshën më të madhe po e merr,ka kaluar nga studentët, besoj që pjesën e forcës po e merr Partia Demokratike. Në një farë mënyre tani është beteja e vërtetë, nëse kjo revoltë do u ngelet të rinjve apo do ta shohë Partia Demokratike. Ju e keni parë që në ditët e para revolta ishte sërish shumë e fortë, sërish shumë e vërtetë, por ishte me një parullë të përbashkët. Rama në burg, Berisha në burg.

Ndërsa sot besoj e keni parë që Berisha mungon nga burgu dhe është zëvendësuar me emrin e Ballukut. Ndërkohë që Balluku është në proces.Dhe paçka që zoti Rama me forcën. Jo Zoti Rama, në këtë rast po zyrtarisht Partia Socialiste, por që kuptohet që është zoti Rama, nuk e ka lëshuar zonjën. Kuptohet tashmë që e ka filluar rrugën përballë drejtësisë. Ndërsa Partia Demokratike ka rikuperuar shumë ato katër muaj e gjysmë ku ata ndiheshin gati si jetim në këtë protestë. Problemi i madh në këtë moment është një problem tjetër.

Problem i cili lidhet me përballjen e asaj që përfaqëson të themi normaliteti dhe ajo që lidhet me biznesin privat. Ndërkohë që ajo që është akumuluar te të rinjtë pothuajse nuk e merr parasysh fare këtë. Dhe një pjesë e studentëve ju e dini tashmë, ose të rinjve, kauzën e tyre e kanë përtej çdo gjëje. Domethënë që o të arrijnë qëllimin e tyre, po nuk duan t’ia shikojnë më fare asgjë që lidhet me të themi, zhvillimin normal të vendit dhe elementë të tjerë. Në një analizë që ka bërë një ekonomist shumë i mirë i vendit tonë, tregonte që korrupsioni është shumë i madh në Shqipëri. Domethënë nga të dhënat e llogaritura prej KLSH-së, sepse ato janë të dhëna zyrtare. Dhe ju e dini që të dhënat e KLSH-së janë gati të frikshme.

Domethënë në qoftë se shteti shqiptar do ndiqte gjetjet e KLSH-së, që prapë unë mendoj që janë të kuruara, unë besoj që do kishte dënime shumë të mëdha. Por keni parasysh tashmë dhe sistemi i drejtësisë nuk funksionon fare. Dhe zoti Rama ka dështuar jo vetëm qeverisjen e vet, po dështoi dhe me reformën në drejtësi. Dhe prandaj në qoftë se keni parë opozita gjeti momentin më të mirë që atë që nuk e bëri me njerëzit e saj, me punën e saj, me politikën e saj, ia dhuroi kjo lëvizje rinore. Kam shqetësimin që Partia Socialiste me Partinë Demokratike për shkak të forcës së madhe të kartonave, do e gjejnë gjuhën e tyre dhe unë mendoj që vendi do vuajë edhe ditë të tjera po kaq të vështira.

Dhe më duket se po shkojmë drejt një lloji, deri tani them që është një gjysmë anarki, por kam frikë se do kalojmë në një anarki dhe do duhet pastaj vetëm ndërhyrja e të huajve që të vendosin diçka në vijë. Me çfarë duket, me atë që shikohet tashmë si fenomen edhe i përbotshëm, nuk është fare e thjeshtë kjo pjesa që protesta në Shqipëri ka gjetur emocionin, frymëzimin, peshën prej padrejtësive shumë të mëdha që ka bërë qeverisja e zotit Rama dhe korrupsioni shumë i madh i tij. Por duket që është një lëvizje shumë më e madhe e cila brenda këtyre dhe çdo vend ju e dini që ka specifikat e vet.

Dhe këtu kam në kokë Milanon, Brukselin, e shihni Athinën.Larg qoftë që të ketë edhe në Prishtinë, sepse ju e dini ajo është një shtet jashtëzakonisht i brishtë. Duket që kjo protestë është mirëfilli një organizim i të majtëve domethënë, i pjesës guerile.

Në Maqedoni shpenzohen 1,4 milionë euro në “OnlyFans” brenda një viti

admin — Sat, 24 Oct 2026 22:36:11 +0000

Përdoruesit nga Maqedonia kanë shpenzuar rreth 1,4 milionë euro në platformën OnlyFans gjatë vitit financiar 2025, tregojnë vlerësimet e shërbimit analitik JuicySearch, të publikuara nga “Bloomberg Adria”.
Të dhënat përfshijnë periudhën nga dhjetori 2024 deri në nëntor 2025. Maqedonia renditet e pesta mes gjashtë vendeve të rajonit të analizuara, me shpenzime prej rreth 1,6 milionë dollarësh për abonime dhe përmbajtje me pagesë.
Në krye të listës është Kroacia me 10 milionë euro, e ndjekur nga Sllovenia me 8,9 milionë dhe Serbia me 7,7 milionë euro. Bosnjë-Hercegovina renditet e katërta me 2,3 milionë euro, ndërsa Mali i Zi i fundit me rreth 600 mijë euro.
Në gjashtë vendet e rajonit, shpenzimet e përgjithshme në OnlyFans vlerësohen në rreth 30,9 milionë euro.
Bosnjë-Hercegovina shënoi rritjen më të dukshme, me 23,9 për qind krahasuar me vitin paraprak.

Eksperti nga Brukseli: KE-ja ta zhbllokojë Kosovën me ide kreative

redaksia2 — Sat, 24 Oct 2026 21:36:10 +0000

Më 15 dhjetor bëhen 4 vjet qëkur Kosova, aplikoi për të marrë statusin e vendit kandidat për në Bashkim Evropian.

Nga ajo ditë, Brukseli kurrë nuk veproi për të ecur para me këtë kërkesë të republikës kosovare.

Gjatë vizitës së saj në Prishtinë, më 1 tetor, kryetarja e Komisionit Evropian, Ursula von Der Leyen tha se bashkë me Kosovën, duhet të binden 27 vendet anëtare që të procedohet me statusin e vendit kandidat.

Por, Toby Vogel, ekspert për Ballkan në Këshillin për Politikat e Demokratizimit me bazë në Bruksel, thotë se është pikërisht Komisioni ai i cili, sipas tij duhet të dalë me “Propozime Kreative” rreth perspektivës evropiane të Kosovës.

Kjo për vetë faktin që pesë vendet anëtare, Spanja, Greqia, Rumania, Qiproja e Sllovakia nuk e njohin shtetin që shpalli pavarësinë më 17 shkurt 2008.

Kurse sa për procesin e bisedimeve për normalizimin e raporteve mes Kosovës dhe Serbisë, po thuhet se BE-ja ka humbur fokusin dhe po e kursen Beogradin.

Të enjten e kësaj jave gjatë Samitit të Berlinit të mbajtur në Budvë, kancelari i Gjermanisë, Friedrich Merz tha se situata e tanishme në dialogun Kosovë-Serbi, për momentin po mban prapa të gjithë. /KlanKosova

Agim Bahtiri me prognozë: Regjimi i Vuçiqit do të bjerë nesër!

redaksia2 — Sat, 24 Oct 2026 21:11:28 +0000

Deputeti i Kuvendit të Kosovës, Agim Bahtiri, u ka bërë thirrje shqiptarëve që jetojnë në Serbi, përfshirë ata në Preshevë, Bujanoc dhe Medvegjë, që të dalin në votime dhe të mbështesin përfaqësimin politik shqiptar.

Përmes një postimi në Facebook, Bahtiri ka deklaruar se shqiptarët meritojnë përfaqësim dinjitoz, të drejta të garantuara dhe një të ardhme ku zëri i tyre nuk anashkalohet.

Postimi i plotë:

REGJIMI I VUÇIQIT DO TË BJERË NESËR!

Shqiptarët e Preshevës, Bujanocit dhe Medvegjës por edhe të gjithë ata që jetojnë kudo në Serbi, meritojnë përfaqësim dinjitoz, të drejta të garantuara dhe një të ardhme ku askush nuk mund t’i anashkalojë.

Prandaj, u bëj thirrje të gjithë shqiptarëve që jetojnë në Serbi: dilni të votoni si kurrë më parë dhe bëjeni zërin tuaj të dëgjohet! Mbështeteni përfaqësimin shqiptar përmes votës suaj demokratike.

Bashkimi është forcë, përfaqësimi është dinjitet!

AS VUÇIQI, AS ASNJË PUSHTET NUK MUND TA INJOROJË ZËRIN E SHQIPTARËVE TË BASHKUAR!

Koalicioni Shqiptar – numri 17.

Rikthehet qetësia në bulevard, boshatisen rrugët e Tiranës pas ndërhyrjes së policisë

redaksia2 — Sat, 24 Oct 2026 20:29:28 +0000

Policia ka arritur të shpërndajë protestuesit, të cilët mbrëmjen e sotme iu rikthyen akteve të dhunshme.

Pas ndërhyrjes së forcave të rendit, rrugët e kryeqytetit janë boshatisur.

Ndërkohë, në bulevardin “Dëshmorët e Kombit” ka nisur pastrimi i gurëve dhe sendeve të tjera të forta të hedhura gjatë përplasjeve mes protestuesve dhe policisë.

Sami Morina: Pavarësisht kushteve të vështira, kompanitë në Vizbeg nuk kanë ndërmend të shpërngulen

redaksia2 — Sat, 24 Oct 2026 20:22:16 +0000

Kompanitë që kanë investuar dhe veprojnë prej dekadash në zonën industriale të Vizbegut nuk kanë ndërmend të largohen, ndërsa zona po përballet edhe me një fluks të ri biznesesh. Kështu deklaroi Sami Morina, kryetar i OEMVP-së, në emisionin “Pas Numrave” në TVM2.

Ai theksoi se zgjidhja e problemeve infrastrukturore të Vizbegut varet nga gatishmëria e qeverisë për të ndërmarrë hapa konkretë.

Morina tha se bizneset nuk e harrojnë këtë zonë dhe do të vazhdojnë të insistojnë që problemet të zgjidhen sa më shpejt.

Sipas tij, disa nga zgjidhjet mund të jenë të dhimbshme, por ato duhet të ndërmerren në mënyrë që zona industriale të zhvillohet dhe të ecë përpara.

Ky është djaloshi që u plagos rëndë në sy gjatë protestës në Tiranë

redaksia7 — Sat, 24 Oct 2026 20:05:15 +0000

Erjon Vishkulli, 28-vjeçari i njohur për mbështetjen e zjarrtë të Kombëtares shqiptare, ka mbetur i plagosur rëndë në sy gjatë protestës së sotme, 24 tetor, në Tiranë.

Sipas raportimeve të mediave shqiptare, i riu u godit me plumb gome nga policia gjatë përplasjeve me protestuesit. Ai u transportua me urgjencë në spital, ku raportohet se i është nënshtruar ndërhyrjes kirurgjikale.

Vishkulli është pjesë e grupimit “Tifozat Kuq e Zi” dhe prej vitesh ndjek Kombëtaren në stadiume. Sot, emri i tij u bë lajm për një ngjarje të rëndë, ndërsa pamjet pas plagosjes qarkulluan në rrjetet sociale.

Ende nuk ka një konfirmim zyrtar mjekësor mbi pasojat për shikimin e tij. Raportimet për dëmtime të përhershme mbeten të pakonfirmuara.

Kaltrina Zekolli-Shaqiri: Rruga e Vizbegut do të lidhet me autostradën Shkup-Bllacë

redaksia7 — Sat, 24 Oct 2026 19:49:02 +0000

Zëvendësministrja e Transportit, Kaltrina Zekolli-Shaqiri, në emisionin “Pas Numrave” në TVM2, sqaroi se lidhja e zonës industriale të Vizbegut me autostradën Shkup-Bllacë do të realizohet përmes qarkores, ku përfundon traseja e autostradës.

Sipas saj, rruga e Vizbegut do të lidhet me këtë qarkore, e cila do të mundësojë edhe lidhjen me autostradën Shkup-Bllacë. Kjo lidhje pritet të ketë rëndësi për qarkullimin dhe qasjen e bizneseve të zonës industriale në infrastrukturën kryesore rrugore.

Sela mobilizon shqiptarët e Luginës: Më 25 tetor, dalje masive në votime!

admin — Sat, 24 Oct 2026 19:36:14 +0000

Kryetari i Lidhjes Shqiptare, Ziadin Sela, u ka bërë thirrje shqiptarëve të Luginës së Preshevës që të dalin masivisht në zgjedhjet parlamentare të 25 tetorit, duke theksuar se këtë herë kanë më shumë se kurrë arsye dhe motiv për të votuar.

Sela ka vlerësuar se bashkimi i subjekteve politike shqiptare duhet të reflektohet edhe në mobilizimin e çdo shqiptari me të drejtë vote, me qëllim arritjen e një suksesi historik dhe sigurimin e përfaqësimit dinjitoz në institucionet e Serbisë.

Ai ka theksuar se shqiptarët e Luginës përballen me padrejtësi dhe se pjesëmarrja në zgjedhje është e rëndësishme për avancimin e të drejtave të tyre.

“Motrat dhe vëllezërit shqiptarë të Luginës, nesër çdo hap i juaji drejt qendrave të votimit do të jetë një hap i rëndësishëm për të drejtat dhe jetën tuaj!”, ka shkruar Sela, duke u uruar sukses shqiptarëve në zgjedhje.

“Zona industriale e Vizbegut me 1.8 miliardë euro qarkullim dhe mbi 4.000 të punësuar, pavarësisht kushteve të vështira infrastrukturore”

redaksia7 — Sat, 24 Oct 2026 19:34:00 +0000

Zona industriale e Vizbegut realizon qarkullim të përgjithshëm që vlerësohet në 1.8 miliardë euro, ndërsa në të punojnë rreth 4.000 persona. Kryetari i Shoqatës së Afaristëve të Vizbegut, Dragan Cvetanovski, në emisionin “Pas Numrave”, theksoi rëndësinë ekonomike të kësaj zone dhe kontributin e saj për shtetin.

Sipas Cvetanovskit, zhvillimi i zonës është rezultat i një procesi 30-vjeçar, gjatë të cilit ajo është shndërruar në një hapësirë të rëndësishme ekonomike me biznese nga sektorë të ndryshëm. Ai vlerësoi se, duke pasur parasysh numrin e të punësuarve dhe qarkullimin që gjeneron, interesi i shtetit për këtë zonë duhet të jetë i madh.

Mevlan Ademi reagon pas raportimeve për ndryshimin e qëndrimeve: Nuk shpallim fitore me zgjidhje gjysmake

redaksia7 — Sat, 24 Oct 2026 19:12:43 +0000

Mevlan Ademi nga Lëvizja Studentore ka reaguar pas publikimit të lajmeve për ndryshimin e qëndrimeve të tij lidhur me zgjidhjen ligjore për provimin e jurisprudencës në gjuhën shqipe.

Ademi ka akuzuar disa portale dhe, siç i ka quajtur ai, PR-të politike, se po shpërndajnë videon e tij të shkëputur nga konteksti.

Ai ka theksuar se studentët e vlerësojnë çdo hap përpara, por sipas tij, zgjidhja e propozuar nuk është e plotë.

“Patjetër që e vlerësojmë çdo hap përpara. Nga 100% maqedonisht, në 50/50 të Bekim Salit, e tani në 84% të Shasivarit. Por si mund të shpallim fitore të plotë me zgjidhje gjysmake dhe kur edhe këtë pak progres më pas e kundërshton vetë Kryeministri, pavarësisht se çfarë thonë ligji dhe Kushtetuta!”, ka shkruar Ademi.

Ai ka shtuar se studentët do ta konsiderojnë këtë çështje të përfunduar vetëm kur provimi i jurisprudencës të mund të jepet në gjuhën shqipe.

“Do të kisha dashur me gjithë zemër që të festonim një fitore të përbashkët dhe të ju faleminderoj sinqerisht nga zemra, por ajo ditë do të jetë kur studenti shqiptar do ta japë provimin në gjuhën shqipe!”, ka përfunduar Ademi.

Iljas Veseli viziton këshilltarin e VLEN-it, Shabi Jakupi, pas aksidentit: Njerëzillëku na bashkon

redaksia7 — Sat, 24 Oct 2026 19:07:30 +0000

Koordinatori i këshilltarëve të AKI-së në Saraj, Iljas Veseli, ka vizituar kolegun e tij, Shabi Jakupi, këshilltar komunal nga VLEN-i, pas aksidentit që pësoi, transmeton Zyrtare.

Përmes një postimi në rrjetet sociale, Veseli theksoi se dallimet politike nuk duhet të pengojnë respektin dhe solidaritetin njerëzor.

“Bindjet politike mund të jenë të ndryshme, por njerëzillëku na bashkon. Pas aksidentit, e vizitova kolegun tim, Shabi Jakupi, këshilltar komunal nga VLEN, sepse mbi çdo dallim politik qëndron respekti, solidariteti dhe humanizmi”, ka shkruar Veseli.

Në fund, ai i ka uruar Jakupit shërim të shpejtë dhe të plotë.

Kaos në disa qytete të Italisë, përplasje mes protestuesve dhe policisë

redaksia2 — Sat, 24 Oct 2026 19:06:12 +0000

Protestat në disa qytete të Italisë janë shoqëruar me tensione dhe përplasje mes demonstruesve dhe forcave të rendit. Roma, Torino, Milano, Firence dhe Bolonja janë ndër qytetet ku janë regjistruar incidente, ndërsa autoritetet kanë marrë masa të shtuara sigurie.

Në Romë, policia ka ndërhyrë ndaj protestuesve duke përdorur mjete ujëhedhëse me presion. Ndërkohë, në Torino, demonstruesit kanë hedhur fishekzjarrë dhe shishe në drejtim të forcave të rendit, të cilat janë përgjigjur me përdorimin e gazit lotsjellës.

Tensione janë raportuar edhe në Firence, ku protestuesit kanë marshuar drejt zonave tregtare luksoze, si dhe në Bolonja, ku hedhja e shisheve është pasuar nga ndërhyrja e policisë.

Në Milano, mijëra studentë kanë dalë në rrugë, ku gjithashtu janë regjistruar përplasje me efektivët.

Ndërkohë, në Romë, 43 të rinj janë shoqëruar në komisariat pasi, sipas autoriteteve, u janë gjetur kapuçë, doreza, dhe maska. Disa protestues kanë hyrë edhe në ambientet e Koloseut.

Autoritetet italiane kanë kryer kontrolle të gjera në Milano dhe në 20 qytete të tjera, ndërsa është identifikuar personi që dyshohet se qëndron pas faqes në Instagram “Movimento 17 ottobre”. Ai po hetohet për nxitje të rënduar të kryerjes së veprave penale, sipas agjencisë italiane të lajmeve ANSA.

Një ditë para zgjedhjeve në Serbi, Kurti thirrje shqiptarëve të Luginës: Votoni numrin 17, Koalicionin Shqiptar

redaksia2 — Sat, 24 Oct 2026 18:06:08 +0000

Kryeministri i Kosovës, Albin Kurti, u ka bërë thirrje të gjithë qytetarëve me të drejtë vote nga Presheva, Bujanoci dhe Medvegja që nesër të dalin masivisht në zgjedhje dhe të votojnë listën e përbashkët “Koalicioni Shqiptar”.

Përmes një postimi në rrjetet sociale, Kurti theksoi se shqiptarët në Luginë kanë të drejtë të ndërtojnë jetën në trojet e tyre me mundësi të barabarta, duke shtuar se vota është përgjigjja më e mirë demokratike ndaj padrejtësive.

“Diskriminimi, përjashtimi dhe shtypja kërkojnë një përgjigje të vendosur demokratike. Me solidaritet. Me këmbëngulje. Me pjesëmarrje. Nesër, është dita kur duhet të shprehni vullnetin tuaj. Përmes votës, secili e secila vendos për përfaqësimin, me kundërvënie si përgjigje”, ka shkruar kryeministri.

Ait pati një porosi të drejtpërdrejtë edhe për të gjithë ata qytetarë të Luginës që aktualisht jetojnë apo ndodhen në Kosovë, duke kërkuar që nesër të udhëtojnë drejt vendlindjes për të votuar.

“Të gjithë ju që ndodheni në Kosovë dhe keni të drejtë vote në Preshevë, Bujanoc e Medvegjë duhet të jeni nesër në vendlindje për të votuar. Sikurse, u bëj thirrje bashkëkombësve në Preshevë, Bujanoc dhe Medvegjë, të përfshihen aktivisht e të dalin secili e secila për të votuar dhe të mbështesin numrin 17, ‘Koalicionin Shqiptar’”, theksoi Kurti.

Adnan Azizi: Lugina nuk harrohet, Lugina nuk është vetëm!

redaksia2 — Sat, 24 Oct 2026 17:23:09 +0000

Deputeti i VLEN-it, Adnan Azizi, në prag të zgjedhjeve parlamentare që mbahen nesër në Serbi, më 25 tetor, u ka bërë thirrje shqiptarëve të Preshevës, Bujanocit dhe Medvegjës që të dalin masivisht në votime.

Përmes një postimi, Azizi ka theksuar rëndësinë e bashkimit të subjekteve politike shqiptare në një koalicion të përbashkët, duke e cilësuar këtë si një hap të rëndësishëm për mbrojtjen e interesave dhe të drejtave të shqiptarëve të Luginës.

Ai ka përmendur sfidat me të cilat përballen shqiptarët në këtë rajon, përfshirë pasivizimin e adresave, mosnjohjen e diplomave, nënpërfaqësimin institucional dhe pengesat në përdorimin e gjuhës shqipe.

Azizi ka theksuar se pjesëmarrja në zgjedhje është një mundësi për të kërkuar barazi, llogaridhënie dhe përfaqësim të denjë, duke nënvizuar se shqiptarët e Maqedonisë së Veriut nuk duhet të jenë indiferentë ndaj fatit të bashkëkombësve të tyre.

“Lugina nuk kërkon favore. Kërkon dinjitet, barazi, zhvillim dhe të drejtën për të jetuar e për të ndërtuar të ardhmen në tokën e vet”, ka shkruar Azizi.

Ai e ka përmbyllur mesazhin me thirrjen drejtuar shqiptarëve të Luginës: “Dilni, votoni dhe bëjeni zërin tuaj të dëgjohet!”

Premtimet për zgjerimin e Sheshit Skënderbeu mbeten në letër

admin — Sat, 24 Oct 2026 17:06:11 +0000

“Në sheshin Skënderbeu ku janë investuar 14 milion euro, gjendja është katastrofike. Ashensorët dhe shkallët elektrike nuk funksionojnë, ndërsa mbetet e pa qartë se çfarë ndodhi me projektin e garazheve në kate”. – Jonila Salmani, gazetare.

Në vend të garazhës me kate, sot parkingu i sheshit duket ende kështu.

Pikërisht për zgjidhjen e këtij kaosi, kryetari i Çairit, pati premtuar zgjidhje , që në kohën kur ishte zv kryeministër i parë. Ai pati premtuar projekt për 371 vendeve të reja për parkim të shpërndara në dy nivele nëntokësore. Nga komuna, thonë se aktualisht në fazë përfundimtare është përgatitja e dokumentacionit, ndërsa sipas dinamikës së paraparë, fillimi i realizimit të projektit, planifikohet gjatë vitit 2027.

“Lidhur me projektin për parkingun te Sheshi “Skënderbeu”, ju informojmë se aktualisht dokumentacioni i nevojshëm është në fazën përfundimtare të përgatitjes, ndërsa procedura për marrjen e lejes për ndërtim është në vijim. Sipas dinamikës së paraparë, fillimi i realizimit të projektit planifikohet gjatë vitit 2027”. Thanë nga Komuna Çairit

Ndërtimi i sheshit ishte paraparë në disa faza. Faza e parë e sheshit përfundoi në vitin 2013. Faza e dytë nisi gjatë vitit 2016, ndërsa sheshi u inaugurua në gusht 2017. Faza e tretë nuk nisi asnjëherë. Në këtë fazë parashikohej edhe vendosja e librarive publike në pjesën e sipërme të sheshit si dhe hapësira të tjera rekreative. Nga ky projekt kompjuterik i publikuar në “Kontratën” e Ganiut, parashihet ndërtimi i garazhit nëntokësor që do të siguronte 380 vend parkime. Afati fillestar për përmbylljen e projektit Sheshi “Skënderbeu” ishte viti 2014, pra është dashur të mbyllej para 10 vitesh. Sa i përket vlerës, fillimisht është paraparë të kushtonte mbi 10 milionë euro, por çmimi final del të jetë më i lartë./Alsat.mk