Kryeparlamentari Gashi takon Kryetarin e Çairit, Izet Mexhiti: Gatishmëri për bashkëpunim të ngushtë dhe mbështetje institucionale

Kryetari i Kuvendit, Afrim Gashi, ka zhvilluar sot një takim me Kryetarin e Komunës së Çairit, Izet Mexhiti, të cilin e ka uruar për marrjen e detyrës së re dhe e ka vlerësuar për rolin e tij të deritanishëm në qeverisje.

“Me kënaqësi të veçantë, takova Kryetarin e Komunës së Çairit, z. Izet Mexhiti. E urova për marrjen e detyrës së re dhe e falënderova për kontributin e tij të vlefshëm si zv. kryeministër dhe ministër”, ka deklaruar Gashi në një reagim publik.

Ai shtoi se gara elektorale që e çoi Mexhitin në krye të Komunës së Çairit ishte një proces dinjitoz dhe demokratik.

“Vlerësova garën dinjitoze që e çoi në krye të Komunës”, theksoi Kryeparlamentari.

Gjatë takimit, palët diskutuan për planet zhvillimore të komunës, projektet prioritare dhe sfidat me të cilat përballen qytetarët e Çairit. Gashi nënvizoi se është i gatshëm të ofrojë mbështetje të plotë institucionale për të përmirësuar jetën e banorëve të kësaj komune.

“Theksova gatishmërinë time për bashkëpunim të ngushtë dhe mbështetje institucionale, me qëllim përmirësimin e mirëqenies së qytetarëve”, u shpreh ai.

Takimi u vlerësua si hap i rëndësishëm për koordinim të vazhdueshëm ndërmjet institucioneve qendrore dhe pushtetit lokal, në funksion të zhvillimit të projekteve që prekin drejtpërdrejt jetën e komunitetit në Çair.