Italia, me një urë unike ekonomiko-politike

Punimet për ndërtimin e urës që do të lidhë ishullin e Siçilisë me Italinë kontinentale do të fillojnë para fundit të verës, sipas njoftimeve të fundit nga Ministria e Infrastrukturës e qeverisë Meloni.

Kostoja totale e projektit është 13.5 miliardë euro dhe përfundimi i tij është planifikuar për vitet 2032-2033.

Gjatësia e urës do të kalojë 3.6 kilometra.

Dy kullat, në fillim dhe në fund të urës, do të jenë 399 metra të larta. Infrastruktura specifike është projektuar për t’i bërë ballë tërmeteve deri në 7.7 pikë (duke pasur parasysh që zona është sizmike) dhe erërave deri në 200 kilometra në orë.

Ky është një “bast” personal i sekretarit të LEGA-s dhe ministrit të Transportit Matteo Salvini, i cili këmbënguli veçanërisht në domosdoshmërinë e projektit, me logjikën se – ndër të tjera – do të rrisë ndjeshëm punësimin (parashikimi përkatës thotë se mund të krijohen deri në 120,000 vende të reja pune) dhe do ta afrojë Siçilinë me pjesën tjetër të Italisë.

Opozita italiane, nga ana e saj, tërheq vëmendjen ndaj rrezikut të infiltrimit nga kontraktorë të lidhur me Mafian dhe thekson se duhet t’u jepet përparësi dhjetëra infrastrukturave të tjera që kanë nevojë urgjente për forcim dhe mirëmbajtje, siç janë lidhjet hekurudhore në Italinë Jugore. Menaxherët e projektit garantojnë se “ura e Mesinës” do të zgjasë të paktën dy shekuj, por shumë organizata mjedisore përgjigjen se çmimi, në aspektin e shkatërrimit të pasurisë mjedisore të rajonit, do të jetë shumë i lartë.

Shuma e taksës që shoferët do të duhet të paguajnë ende nuk është përcaktuar. Ministria e Transportit, megjithatë, i siguron italianët se “çmimet do të jenë konkurruese dhe plotësisht të arsyeshme”.

Ura më e madhe në botë në kategorinë e saj do të ndërtohet me fonde kombëtare dhe evropiane. Një pjesë e shumës, në fakt, duhet të konsiderohet si shpenzim mbrojtës, pasi do të lehtësojë lidhjet strategjike rrugore në rast lufte. Në këtë mënyrë, qeveria Meloni pritet të jetë në gjendje t’i afrohet më lehtë qëllimit të ndarjes së 5% të PBB-së së vendit për shpenzimet e mbrojtjes. /tesheshi.com/