Dy të mbytur, ish-banorja e BBVA trondit rrjetin: Në datën 29 nuk duhet të laheni në det. Ja pse!

Pasditja e djeshme shënoi dy ngjarje tragjike në plazhet e Shqipërisë, ku dy persona humbën jetën duke u mbytur në rrethana të ndryshme. Këto incidente kanë shokuar pushuesit dhe opinionin publik në këtë periudhë të nxehtë vere kur frekuentimi i bregdetit është në kulmin e tij.

Rasti i parë u regjistrua në Durrës, në zonën e njohur si Sektori Rinia. Rreth orës 14:30, në det u gjet trupi i pajetë i një burri rreth 50 vjeç, identiteti i të cilit ende nuk është konfirmuar zyrtarisht nga policia. Autoritetet lokale njoftuan se paraprakisht dyshohet se shtetasi është mbytur në det. Grupi hetimor ndodhet në vendngjarje dhe po punon për identifikimin e plotë të viktimës dhe sqarimin e rrethanave të këtij rasti tragjik.

Ngjarja tjetër e rëndë ndodhi në Zvërnec, Vlorë, ku një 29-vjeçar me inicialet R. D., nga fshati Peshtan i Fierit, dyshohet se është mbytur në det rreth orës 16:56. Policia e Vlorës ka konfirmuar këtë ngjarje dhe ka nisur hetimet për të zbardhur rrethanat e tragjedisë. Grupi hetimor ndodhet në vendin e ngjarjes duke kryer veprimet e nevojshme.

Përtej këtyre dy ngjarjeve tragjike, një koment i papritur në rrjetet sociale ka ndezur reagime të shumta. Ish-banorja e Big Brother VIP Albania, Arsida Cerpja, përmes një postimi në Instagram, ka ndarë një bindje personale që lidh këto mbytje me një supersticion të vjetër. Ajo shkroi: “Në Itali një besim i vjetër thotë që më 29 qershor nuk duhet të lahesh në det. Po shihja sot që dy veta ishin mbytur në det në Shqipëri. Kishit dëgjuar më parë për këtë bestytni?”, duke e cilësuar këtë datë si “të mallkuar” dhe duke sugjeruar një lidhje mes kësaj besytnie dhe ngjarjeve të fundit.

Ky reagim i ish-banores së Big Brother ka nxitur diskutime të ndryshme në rrjetet sociale, me shumë përdorues që kanë shprehur habinë apo skepticizmin e tyre ndaj kësaj lidhjeje supersticioze me dy tragjeditë e ndodhura në plazhet shqiptare. Ndërkohë, autoritetet vijojnë hetimet e tyre për të zbardhur plotësisht rrethanat e mbytjeve.