Lamtumirë Margarita Xhepa! Homazhet për ikonën e kinematografisë, i biri Ndriçim Xhepa tregon pengun e aktores

Për nder të Margarita Xhepës, një prej figurave më të shquara të artit shqiptar, homazhet janë zhvilluar sot, duke filluar nga ora 10:00, në Teatrin Kombëtar të Operas dhe Baletit (TKOB). Margarita Xhepa, e cila u nda nga jeta më 3 prill, në moshën 91-vjeçare, la pas një trashëgimi të pasur në botën e kinematografisë dhe teatrit.

Në TKOB janë mbledhur familjarë, miq, kolegë, dhe shumë qytetarë për t’i dhënë lamtumirën e fundit aktorës së njohur. Ndriçim Xhepa, djali i Margarita Xhepës, mbajti një fjalë ngushëlluese para gazetarëve, duke theksuar se nëna e tij ka kaluar nga jeta në mënyrë të qetë, pavarësisht disa shqetësimeve shëndetësore të vogla në muajt e fundit. Ai shtoi se Margarita Xhepa e kishte pranuar mbylljen e karrierës së saj në teatër, por gjithmonë ka mbajtur një dëshirë për të realizuar një film të ri.

“Në 91 vite jetë, 70 vite i pati në skenë dhe ekran. Punoi me dashuri dhe pasion të madh. Unë vetë jam i biri i saj dhe kam përshtypjen se në përmasat që kishte, kam frikë se nuk e kam të jem i sinqertë.. Mbylli jetën e saj në mënyrë normale edhe pse se dy muajt e fundit kishte probleme të karakterit shëndetësor, lodhjet e viteve bëjnë të vetën. Kishte një natyrë të çuditshme, madje kur binte biseda në momente të shkëputura, kishte vite që thoshte për skenë nuk kam fuqi, por për filmin kishte dëshirë të bënte edhe një. Filmi “Bolero në vilën e pleqve” përkon edhe me fundin e jetës së saj“, tha aktori.