Bora nusëron Hagia Sophia-n

Stambolli është goditur nga reshjet e borës, duke shkaktuar probleme në trafik, por duke sjellë dhe pamje idilike të Hagia Sophia, një prej simboleve më të njohura të këtij metropoli gjigand me një tërheqje të pashtershme nga e gjithë bota.

Fotot tregojnë vetë ngrehinën e lashtë me kumt fetar, e cila duket magjike nën dëborë. Përveç vetë Hagia Sophia-s, shihet tutje dhe Beshiktashi e Levendi.

Ky monument historik është një nga atraksionet turistike më të famshme në Stamboll dhe ndodhet në lagjen historike të quajtur Sulltanhamet.

Përveçse një monument madhështor, Hagia Sophia është dëshmitare e turbulencave të shumta historike që kanë tronditur rajonin gjatë shekujve.

Hagia Sophia, siç duket sot, është ndërtuar rreth vitit 532 pas Krishtit si një Katedrale ortodokse dhe tashmë ka arritur famë botërore për madhësinë dhe bukurinë e saj, duke qenë një xhami.

Pas çlirimit osman të Kostandinopojës (Stambolli i sotëm) në 1453, Hagia Sophia u shndërrua në një vend adhurimi musliman dhe gjatë viteve në vijim u shtuan katër minare, të cilat qëndrojnë edhe sot.

Ky nuk qe një shndërrim i dhunshëm, por krejt i paqtë. Ajo u ble nga udhëheqësia e perandorisë së re islame, për t’u bërë një vend ku adhurohet Zoti një i vetëm.

Si xhami, ai funksionoi deri në vitin 1935, kur nga regjimi laik i kohës u kthye në muze dhe dëshmitar i historisë. Por në vitin 2020, presidenti turk Rexhep Tajip Erdogan e riklasifikoi sërish si xhami, si mesazh i rikthimit të Turqisë në një fuqi botërore, siç ishte Perandoria Osmane për pesë shekuj me radhë. /teshesh.com/