Mbështetje teknike që RMV të luftojë kërcënimet hibride/ NATO po rritet edhe me shumë, Finlanda bëhet anëtarja e 31-të

NATO-ja është e gatshme t’i jap mbështetje teknike dhe ta rrisë edhe më shumë bashkëpunimin me Maqedoninë e Veriut në luftën e saj kundër kërcënimeve hibride dhe dezinformatave, u zotua sot sekretari gjeneral i Alaencës Jens Stoltenbeg. I pyetur nga TV21 rreth vizitës të disa javëve më parë të zyrtarëve të NATO-s në Shkup, u shpreh se NATO dhe Qeveria kanë rënë dakord për një sërë hapash afatshkurtër dhe afatgjatë të cilët aleatët mund t’i ndërmarrin për ta mbështetur Maqedoninë e Veriut në mbrojtjen kundër fushatave hibride me të cilat po përballet.

“E kam diskutuar këtë me kryeministrin e Maqedonisë së Veriut së fundmi dhe kuptohet se NATO është aty për të mbështetur aleatët, gjë që tani e bën me Maqedoninë e Veriut e cila po përballet me kërcënime të ndryshme hibride. Mbështetja që aleatët janë të gatshëm ta japin për Maqedoninë e Veriut është mbështetja teknike dhe bashkëpunim më të fuqishëm për të luftuar dezinfomatat. Do të doja të përgëzoj Qeverinë e Maqedonisë së Veriut për punën e shpejtë dhe të detajuar në zhvillimin e programit të bashkëpunimit për të cilin kemi rënë dakord.”- deklaroi Jens Stoltenberg, Sekretar Gjeneral i NATO-s.

Këtë Stoltenberg e tha një ditë para takimit të Ministrave të Jashtëm të vendeve anëtare të NATO-s. E quajti javë historike pasi nesër Finlanda do të bëhet anëtarja e 31-të e Aleancës, kjo pasi Turqia më në fund e ratifikoi protokollin, por të njëjtën gjë nuk po e bën edhe për Suedinë, e cila po ashtu synon anëtarësimin në Aleancë. Pengesë për këtë është edhe Hungaria, por Stoltenberg u shpreh i bindur se do të kenë sukses edhe me anëtarsimin e Suedisë.

“Është ditë historike dhe e madhe për NATO-n dhe për Finlandën të cilën po e mirëpresim si antëtarja e 31 e Aleancës. Kjo në vetëvete është diçka për të cilën duhet të festojmë dhe ta njohim rëndësinë e saj. Kjo po ashtu sepse demonstron se dera e NATO-s mbetet e hapur dhe se çdo komb ka të drejtën e zgjedhjes së rrugës së vet dhe jo Moska të vendosë se kush do të jetë anëtar i NATO-s e kush jo, ky është vendim i vendeve që aplikojnë dhe i NATO-s. Kjo do të demontrohet shumë qartë këtu në selinë e NATO-s nesër, kur ta ngremë falmurin finlandez dhe ta finalizojmë procesin e anëtarësimit. Kjo po ashtu është e mirë për Suedinë, të cilën e bën edhe më të integruar në NATO dhe e bën më të sigurtë.”- pohoi Jens Stoltenberg, Sekretar Gjeneral i NATO-s.

Takimi i Ministrave të Jashtëm të NATO-s po ndodh në një moment të rëndësishëm për sigurinë e Aleancës. Invazoni rus në Ukrainë po ashtu do të jetë në fokus të këtij takimi, gjersa nesër pritet të mbahet Komisioni NATO-Ukrainë që do të ripërsërisë mbështetjen e Aleancës ndaj Kievit. Stoltenberg e përshëndeti planin e Zelenskit për paqe, por tha se nuk ka ndonjë shenjë që Putini po përgatitet për paqe, por për më shumë luftë, andaj mbështetja e NATO-s ndaj Ukrainës nuk do të ndalet, siç ka ndodhur edhe deri më tani, ku janë dhënë rreth 65 miliardë euro ndihmë ushtarake për Ukrainën. Besir Arifi, TV21, Bruksel.