Tender i paracaktuar për pastrimin e Spitalit Ushtarak? Me fondet publike do pastrohet dhe Spitali Amerikan!

Nga Boldnews.al

Spitali Universitar i Traumës, apo siç njihet Spitali Ushtarak, ka hapur sërish një super tender për pastrimin e ambienteve, të jashtme dhe të brendshme. Pak javë më parë, BoldNews.al denoncoi një tender pastrimit të SUT, i cili ishte me një vlerë 790.000 euro.

Objekti i tenderit ishte për pastrimin e ambienteve të jashtme dhe të brendshme.

Por, çfarë ndodhi?!

Disa javë më vonë, Spitali Ushtarak ka hapur sërish tenderin me këtë objekt, por kësaj herë shuma ka shkuar në plot 1.137.991 euro, ose rreth 350 mijë euro më shumë nga vlera e parë, duke ngritur dyshime të mëdha se gjithçka po bëhet për të favorizuar një firmë të caktuar.

Burime për BoldNews.al thanë se ky tender është i paracaktuar, pasi pritet t’i jepet një kompanie që vijon operimin në këtë spital.

BoldNews.al ka siguruar dokumentet e tenderit në Agjencinë e Prokurimit Publik, ku vlera është fryrë tej mase. Ndërkohë, tenderi i dytë është një marrëveshjes kuadër “shërbim pastrimi, për Spitalin Universitar të Traumës”. Vlera e këtij tenderi është 137.991.275 lekë pa TVSH, ose 1.137.791 euro.

Kohëzgjatja e kontratës ose afati për zbatimin e saj është 36 muaj. Më parë, tenderi “për kryerjen e shërbimit të Pastrimit të ambienteve të brendshme dhe pastrim sistemim gjelbërimi i ambienteve të jashtme për Spitalin Universitar të Traumës”, është fituar nga operatori ‘Sori –al SHPK’, me administratore Alma Tafanin, e cila njihet edhe si ish-bashkëshortja e Nikolin Jakës.

Por, skandali thellohet edhe më tej! BoldNews.al verifikoi dokumentet shoqëruese të këtij tenderi, ku Spitali Universitar i Traumës ka publikuar edhe hartën se çfarë do të pastrohet, sipërfaqe e brendshme dhe ajo e jashtme.

Por, nga krahasimi i hartave rezulton se në dokumentet e tenderit do të pastrohet edhe sipërfaqja e Spitalit Amerikan, që është ngjitur me Spitalin Ushtarak.

Një skandal i përmasave të mëdha, pasi me lekët e taksave, do të pastrohet edhe një subjekt privat. Ky subjekt, përveçse ka marrë ambiente apo ka përvetësuar disa godina, tashmë edhe pastrimin ia mbulon shteti.