Berisha: Selia e PD u mbajt me terror dhe dhunë nga Lul Brava dhe Edi Rama

Ish-Kryeministri Sali Berisha u shpreh se Lulzim Basha dhe Edi Rama faktuan sot se janë bashkë dhe se selinë e Partisë Demokratike po e mban me dhunën dhe terrorin, që u pa nga të gjithë sot.

“Ata që sot ushtruan dhunë dhe terror ndaj demokratëve, tashmë dihet se kush janë, janë mercenarët e Edi Ramës, që i shkuan në ndihmë Lulzim Bashës”, tha Berisha.

Ai u shpreh se protesta e sotme do të mbyllet, por do të ketë të tjera protesta edhe më të fuqishme.

“Protesta u faktoi shqiptarëve fytyrën e vërtetë të regjimit të sotëm. U faktoi në mënyrë përfundimtare se Edi Rama mban peng Lul Bravën dhe së bashku me të, me dhunë e terror shtëpinë e Partisë Demokratike.

Ky përbën një akt të pashembullt në 30 vite. Përpjekjet do vijojnë gjer në arritjen e plotë të qëllimit.

Sot ne do shpërndahemi, do të kujdesemi për vëllezërit dhe motrat tona të arrestuar se janë vërsuluar si bisha ndaj tyre për të mbushur komisariatet.

Do kujdesemi për të plagosurit, të cilët janë goditur me çarje koke dhe në forma të tjera. Do njoftojmë shumë shpejt betejën tjetër, të cilat nuk ndalen kurrë gjerë në fitoren tonë të plotë.

Shpreh mirënjohjen e pakufishme dnaj të gjithë atyre dhjetra mijëra demokratëve që ishin bashkë me ne”, tha Berisha.