Referendumi/ Berisha: 44 mijë demokratë morën pjesë, Basha u shkarkua

Ish-kryeministri Sali Berisha deklaroi mbrëmjen e kësaj të Shtunë se rreth 44 mijë demokratë votuan në referendumin e sotëm të PD. Berisha tha demokratët vendosën “në mënyrën më plebishitare”, shkarkimin e Lulzim Bashës si kryetar i Partisë Demokratike.

Nga ambientet e jashtme të selisë blu, Berisha e nisi fjalën e tij duke falenderuar votuesit në referendumin e sotëm.

“Ju falenderoj nga zemra ju që jeni këtu, por dhe mbarë demokratët shqiptarë të cilët firmosën sot më 18 dhjetor në një akt madhor, në një monument madhështor të lirisë së pluralizmit politik, referendumin e parë të thirrur nga anëtarësia e një force politike në historinë e Shqipërisë, por mundet dhe më gjerë, të europës e më gjerë. Ndaj dhe unë dua të përulem me nderim më të madh, para rreth 44 mijë demokratëve dhe demokrateve që sot vendosën me votën e tyre në mënyrën më plebishitare largimin e peng Bashës. E Lul Bravës nga drejtimi përfundimtar i forcës politike”, u shpreh Berisha.

“Ky është ndëshkimi më i merituar që një person i padenjë për detyrë, që një person që detyrën më të lartë të kreut të opozitës e shfrytëzon për pazare personale dhe trajton PD si një pronë të tij. Ky është votimi më i shkëlqyer që shkruan një kapitull të ri në historinë e revolucionit demokratik. Ky revolucion s’ka të ndaluar, s’ka forcë në botë që mund ta ndalë”, shtoi.

Berisha tha se Rama u përpoq ti vijë në ndihmë Bashës.

“Jeni dëshmitarë të përjekjeve të turpshme të narkoshtetit kundër këtij akti madhor në historinë e pluralizimit. Mjafton tu rikujtoj paraqitjen me orë të tëra në studio televizive të pengmarrësit në ndihmë të pengut të tij, etj, etj. Por, asgjë nuk mund të ndalë njerëzit e lirë në realizimin e qëllimeve të tyre. S’ka forcë që pengon dot njerzëit e lirë në arritjen e objkektivave të tyre për liri e dinjitet”, tha ish-kryeministri.