Ambasada amerikane në Shqipëri dënon dhunën që përfundoi me vrasje në Elbasan

Ambasada e Shteteve të Bashkuara të Amerikës në Tiranë, ka dënuar dhunën ndodhur sot në Elbasan, e cila përfundoi me vdekjen e një personi dhe plagosjen e disa të tjerëve.

Kjo ambasadë, iu ka bërë thirrje zyrtarëve për zbatim të ligjit, dhe të hetojnë incidentin sa më shpejtë në mënyrë që të identifikohen autorët, njofton Klan Kosova.

”Kemi ndjekur raportimet për dhunën në Elbasan sot, e cila përfundoi në vdekjen e një personi dhe plagosjen e të tjerëve. Ne u bëjmë thirrje zyrtarëve të zbatimit të ligjit të hetojnë këtë incident sa më shpejt dhe në mënyrë të plotë, të identifikojnë autorët dhe t’i dënojnë me të gjithë forcën e ligjit. Ata që përfshihen në dhunë të tillë duhet të ndëshkohen. Ambasadorja Kim i ka kërkuar Presidentit Meta, Kryeministrit Rama dhe Kryetarit të Partisë Demokratike Basha të ushtrojnë vetëpërmbajtje – dhe të udhëheqin në të njëjtën mënyrë – ndërsa çështja është duke u hetuar. Veprimet tona duhet të bazohen në fakte, jo në frikë apo thashetheme. Kur vetëm disa ditë na ndajnë nga zgjedhjet e 25 prillit, ne përsërisim deklaratën tonë të 26 marsit duke bërë thirrje që udhëheqësit – ata që janë në pushtet dhe ata që kërkojnë pushtet – të refuzojnë qartazi dhunën. Ambasada Amerikane do të vazhdojë të monitorojë situatën nga afër”.

.