Bogojevski: “Shqiptarët nuk i lejojnë gratë të turpërohen në kafene”, sulmon burrat maqedonas dhe kërkon kontrollin e grave

Petar Bogojevski, lider i partisë “Koncepti Maqedonas”, ka nxitur reagime të reja me deklaratat e tij për rolin e gruas në familje, duke marrë shqiptarët si shembull për atë që ai e quan kontroll të burrave ndaj bashkëshorteve.
Në një video të publikuar më 3 nëntor, Bogojevski u drejtua kundër burrave maqedonas që e kishin kritikuar, duke pretenduar se shqiptarët nuk i lejojnë gratë e tyre “të turpërohen nëpër kafene dhe rrugët e Shkupit”.
Ai madje i pyeti burrat maqedonas nëse u pëlqen që vajzat e tyre të dalin “gjysmë të zhveshura para Silbos” dhe nëse janë në gjendje t’i marrin bashkëshortet nga lokalet.
Deklaratat vijnë pas paraqitjes së tij në emisionin “Pod lupa” në TV Alfa, ku Bogojevski kishte pretenduar se reagimi i burrit ndaj tradhtisë së bashkëshortes nuk përbën dhunë, por mbrojtje të dinjitetit të tij.
Ai gjithashtu kishte deklaruar se gruaja duhet të jetë nën mbikëqyrjen e burrit dhe se kjo është përgjegjësi e bashkëshortit.
Reagime dhe paralajmërim për përgjegjësi
Deklaratat kanë nxitur reagime të shumta. Akademia Ushtarake “Gjeneral Mihailo Apostolski”, ku Bogojevski punon si docent, ka bërë të ditur se materialet e paraqitura do t’i shqyrtojnë organet kompetente, të cilat do të vlerësojnë nëse janë shkelur detyrimet profesionale dhe etike.
Edhe zëdhënësja e Qeverisë dhe kryetarja e Unionit të Grave të VMRO-DPMNE-së, Marija Miteva, i dënoi deklaratat, duke theksuar se gruas nuk i nevojitet mbikëqyrja e burrit, por respekti.
Ndërkohë, Agjencia për Shërbime Mediatike Audio dhe Audiovizuale vlerësoi se në emision Bogojevski kishte relativizuar dhe justifikuar dhunën ndaj grave dhe fëmijëve, duke u përpjekur ta paraqiste nënshtrimin e tyre si vlerë tradicionale./plusinfo.mk