Pas 27 vitesh, Albulena Haxhiu rikthehet në Kondovë, te familja që e strehoi gjatë luftës

Kryetarja e Kuvendit të Kosovës, Albulena Haxhiu, gjatë vizitës në Maqedoninë e Veriut, është rikthyer në Kondovë të Shkupit, te familja Sinani, e cila e kishte strehuar si refugjate gjatë luftës së Kosovës, përcjell TV21.

Haxhiu tha se kjo vizitë, pas 27 vitesh, ishte një mundësi për t’u çmallur, për të kujtuar dhe për të shprehur mirënjohjen ndaj familjes që e kishte pritur në ditët e vështira të luftës.

“Pas 27 vitesh, u ktheva aty ku kisha ardhur si fëmijë refugjat lufte”, shkroi ajo.

Në mesazhin e saj, Haxhiu falënderoi edhe shqiptarët e tjerë të Maqedonisë së Veriut për strehimin dhe mbështetjen që u ofruan refugjatëve nga Kosova.

“Mirënjohje e përjetshme për solidaritetin, bujarinë dhe humanizmin e tyre”, u shpreh Haxhiu.

Gjatë ditës, ajo zhvilloi edhe takime bilaterale, si dhe u takua me kryetarët e komunave me shumicë shqiptare në Maqedoninë e Veriut./tv21