Hetim ndaj vllehësit që dyshohet se mashtronte me “vaksina kubaneze” kundër kancerit

Prokuroria kërkon t’i merret pasaporta

Prokuroria Themelore Publike në Veles po heton një person të dyshuar për mashtrim dhe mjekim të paligjshëm, i cili dyshohet se u ka premtuar disa personave “vaksina kubaneze” kundër kancerit, me qëllim përfitimin e kundërligjshëm financiar.

Gjatë kontrolleve në disa lokacione, përfshirë vendin e tij të punës në Veles, janë sekuestruar pajisje elektronike dhe janë gjetur prova që do t’i nënshtrohen ekspertizës.

Prokuroria ka marrë në pyetje personat e dëmtuar dhe dëshmitarë të mundshëm, ndërsa gjykatës i ka propozuar t’ia marrë pasaportën të dyshuarit dhe ta detyrojë të paraqitet rregullisht në gjykatë.

I dyshuari aktualisht është i shtruar në një institucion shëndetësor, ku i është dorëzuar vendimi për masat e kujdesit. Hetimet po vazhdojnë në bashkëpunim me Ministrinë e Punëve të Brendshme.