“SharrCup” mbledh 80 çiklistë nga 6 shtete – Tetova në qendër të çiklizmit

Tetova sot ka qenë në qendër të vëmendjes së sportit dhe turizmit rajonal. Në qytet është zhvilluar SharrCup, një aktivitet që ndërthur sportin, natyrën dhe promovimin e potencialeve turistike të Tetovës dhe Malit Sharr.

Sipas kryetarit të Komunës së Tetovës, Bilall Kasami, në garë morën pjesë rreth 80 çiklistë nga gjashtë shtete: Maqedonia e Veriut, Kosova, Shqipëria, Greqia, Zvicra dhe Bullgaria.

Kasami tha se organizime të tilla janë pjesë e synimit për ta pozicionuar Tetovën si një destinacion ku gjatë gjithë vitit zhvillohen aktivitete sportive, kulturore dhe turistike.

“Tetova sot është qendra e çiklizmit!”, deklaroi Kasami, duke theksuar se qyteti synon të tërheqë më shumë vizitorë dhe të promovojë potencialet natyrore të Tetovës dhe Malit Sharr.

Sipas tij, aktivitetet e këtij lloji kontribuojnë në krijimin e një imazhi të Tetovës si qytet aktiv, modern dhe i hapur, me ambicie për të zhvilluar më tej sportin dhe turizmin.

SharrCup kështu e kthen Tetovën në një pikë takimi për çiklistët e rajonit, ndërsa Mali Sharr shërben si një nga asetet kryesore natyrore për zhvillimin e turizmit sportiv.