Me rastin e përvjetorit të parë të NoRa: Promovojmë Ligjin për Konfiskim të Zgjeruar

Më 21 gusht të vitit të kaluar mbajtëm Kongresin Themelues të REPUBLIKËS SË RE. Misioni ynë është:

* Një komb kompakt dhe i suksesshëm i Maqedonisë së Veriut, ku secili i realizon të drejtat e veta individuale dhe kolektive;
* Një shtet i sigurt dhe prosperues, i integruar në BE dhe aleat konsekuent në NATO.

Prandaj, në mënyrë të vazhdueshme angazhohemi për sundimin e ligjit, të përforcuar përmes:

* vettingut në gjyqësor, parti, shërbime, diplomaci, media dhe administratë;
* hapjes së arkivave të shërbimeve sekrete jugosllave;
* konfiskimit të zgjeruar të pasurisë së përfituar nga kriminaliteti, në përputhje me ligjin;
* zgjerimit të përfshirjes së masave kufizuese të SHBA-së, Mbretërisë së Bashkuar dhe Kanadasë, krahas atyre evropiane;
* rregullimit ligjor të veprimtarisë me kriptovalutat.

Draftin e parë të Ligjit për Konfiskim të Zgjeruar e promovojmë sot dhe mund ta merrni këtu, ndërsa po qëndrojmë së bashku në këtë aktivitet.

Sundimi i ligjit garanton rendin dhe mundëson prosperitet përmes sipërmarrjes dhe investimeve nga vendi, BE-ja dhe më gjerë.

Oligarkia jonë dhe partitë e saj në Kuvend janë kundër këtij koncepti. Prandaj ato ruajnë:

* mungesën e konkurrencës përmes barrierave administrative ndaj biznesit;
* deindustrializimin përmes një ekonomie të mbështetur te kanabisi dhe lojërat e fatit;
* një sistem bankar dhe financiar në shërbim të një ekonomie jofunksionale;
* një model zgjedhor që pengon përfaqësimin;
* vetëbllokimin e integrimit në BE.

Synimi i tyre është ruajtja e status quo-së për të mbajtur privilegjet e një duzine familjesh.

Përgjigjja jonë është: “Liri, rend, prosperitet” për popullin maqedonas dhe kombin e Maqedonisë së Veriut, përmes:

* menaxhimit të përgjegjshëm të institucioneve dhe transparencës së buxheteve publike;
* barazisë para ligjit;
* investimeve në ndërmarrjet e vogla dhe të mesme familjare, për produkte dhe shërbime konkurruese si në tregun vendor, ashtu edhe në tregjet perëndimore, përmes zinxhirit të furnizimit.

Ekonomia, siguria dhe sundimi i ligjit janë të ndërlidhura.

Ne mbështesim edhe zgjidhje themelore, prej të cilave veçojmë disa:

1. Investim buxhetor dhe pjesëmarrje pronësore e Maqedonisë së Veriut në reaktorët bërthamorë në Bullgari. Duam çmim më të ulët të energjisë elektrike për bizneset dhe amvisëritë, në vend të projektit “Hekurudha e Shpejtë” – “Shkupi 2014” i ri.

2. Zbatim konsekuent i Marrëveshjes së Prespës dhe Kornizës së Negociatave.

Qëllimi ynë është evropianizimi i kombit, në vend të “anadolizimit” demografik. Synimi është që Maqedonia e Veriut të jetë pjesë e valës së zgjerimit të BE-së bashkë me Malin e Zi, Shqipërinë dhe Moldavinë.

Nëse opozita parlamentare mbetet besnike ndaj pushtetit dhe jo ndaj qytetarëve, ajo nuk do t’i dorëzojë ndryshimet kushtetuese në Kuvend gjatë tre muajve të ardhshëm. Atëherë do të na duhet ne të iniciojmë procesin e mbledhjes së 150 mijë nënshkrimeve në vitin 2027.

3. Zgjedhje e njëhershme (ri) e gjyqtarëve dhe prokurorëve në Kuvend. Lufta e suksesshme kundër korrupsionit kërkon gjyqësor dhe prokurori me integritet. Korrupsioni “ushqen” ndikimet lindore në vend dhe në rajon – dhe mbron kapitalin ilegal.

4. Fokus në lidhjet hekurudhore dhe rrugore përgjatë Korridorit 8 dhe rehabilitimin e infrastrukturës hekurudhore përgjatë Korridorit 10, në vend të ndërtimeve të tepruara në qendrat urbane, shkatërrimit të tokës bujqësore dhe ndërhyrjeve në burimet ujore.

5. Reduktimi i administratës shtetërore dhe publike. Në epokën e digjitalizimit, nuk ka vend për administratë të stërmadhe.

Republika e Re nënkupton një Maqedoni të Veriut prosperuese dhe produktive, në vend të një shteti kuazi-social.

Partitë parlamentare janë në një koalicion informal, por të dukshëm, që asgjë të mos ndryshojë.

Përpara nesh – shumicës së papërfaqësuar – qëndron mundësia që, si parti, qytetarë, lista të pavarura dhe platforma me orientim kombëtar, qytetar, sipërmarrës, evropian dhe euroatlantik, të organizohemi.

Ne në bazë të parimeve dhe interesit të kombit – ata për përfitime nga buxhetet publike.

Për t’i mposhtur, duhet të jemi të bashkuar dhe të organizuar. Prandaj bëjmë thirrje për një proces të bazuar në barazi, gjithëpërfshirje dhe aktivizëm qytetar e politik.

Zonja dhe zotërinj,

Në emër të Bordit Kombëtar dhe në emrin tim, ju falënderoj për mundësinë që së bashku të shënojmë përvjetorin e fillimit të misionit tonë.

Për shumë përvjetorë të tillë, për suksese, për kombin evropian të Maqedonisë së Veriut.