Kurti: Kosova humbi mbi 40 milionë euro nga BE-ja për shkak të bllokadës në Kuvend

Kryeministri i Kosovës, Albin Kurti, ka deklaruar se vendi ka humbur mundësinë për të përfituar mbi 40 milionë euro nga Bashkimi Evropian, si pasojë e mosmiratimit të ligjeve në Kuvend.

Kurti i bëri këto deklarata të premten, gjatë Mbledhjes së Dytë të Këshillit Ministror për Integrim Evropian, në funksionin e Komitetit Drejtues për Planin e Rritjes, ku u diskutua për zbatimin e reformave, projektet ekzistuese dhe programet IPA.

Kryeministri njoftoi se më 15 korrik, Qeveria ia kishte dorëzuar Komisionit Evropian raportin e parë zyrtar për zbatimin e Agjendës së Reformave dhe kërkesën e parë për lirimin e fondeve nga Plani i Rritjes.

“Deri më 30 qershor kemi zbatuar dhe raportuar te KE-ja 20 hapa të reformave, në vlerë prej gjithsej 153,3 milionë euro në fonde të Bashkimit Evropian. Aktualisht, KE-ja është duke kryer vlerësimin. Pas vlerësimit, Komisioni do ta miratojë vendimin për lirimin e fondeve dhe pastaj Kosova do të përfitojë fondet përkatëse sipas këtij vendimi”, tha Kurti.

Ai bëri të ditur se në fillim të javës së ardhshme Kuvendit do t’i përcillen tri marrëveshje ndërkombëtare për programet IPA. Në kuadër të tyre përfshihen dy amendamente për projektet IPA 2021 dhe IPA 2022, si dhe Marrëveshja Financiare IPA 2026–2027, përmes të cilave Kosova pritet të përfitojë 258 milionë euro.

Sipas Kurtit, nga Plani i Rritjes dhe programet IPA, Kosova pritet të përfitojë mbi 400 milionë euro për qeverisje të mirë dhe zbatimin e reformave drejt anëtarësimit në Bashkimin Evropian.

Megjithatë, ai tha se nga 13 reformat e parapara për afatin e 30 qershorit, gjashtë nuk janë zbatuar në kohë. Për pasojë, nga 90.7 milionë eurot e planifikuara për këtë afat, Kosova nuk ka përfituar mbi 40 milionë euro.

“Arsyeja e mospërfitimit të këtyre mjeteve është bllokada në Kuvend, e cila pamundësoi miratimin e ligjeve”, tha Kurti.

Ai shtoi se të gjitha projektligjet e parapara për afatin e 30 qershorit do të procedohen në seancën e radhës të Kuvendit.

Kurti theksoi se vëmendja tash duhet të përqendrohet te zbatimi i 22 reformave që kanë afat deri në fund të dhjetorit, me vlerë prej 131.4 milionë eurosh në fonde të BE-së. Sipas tij, tetë prej këtyre reformave kërkojnë miratimin e projektligjeve në Kuvend, ndërsa bëhet fjalë për gjithsej 10 projektligje me afat deri më 31 dhjetor 2026.

“Këto projektligje janë duke u finalizuar dhe do t’i miratojmë në qeveri brenda këtij afati. Në këtë drejtim kemi punuar edhe me Komisionin Evropian që projektligjet, të cilat kanë për afat 31 dhjetorin, ta kryejnë konsultimin me Bashkimin Evropian në afat më të shpejtë. Nëse Kuvendi do të jetë funksional, reformat dhe mjetet e dedikuara për to nuk do të humben”, u shpreh ai.

Kryeministri tha se, për shkak të bllokadës në Kuvend, nuk do të dështojë zbatimi i reformave të parapara, por do të humbin fondet e dedikuara për to.

Gjatë fjalimit të tij, Kurti foli edhe për situatën institucionale dhe afatin për zgjedhjen e presidentit të ri. Ai deklaroi se, nëse presidenti nuk zgjidhet deri më 6 tetor, vendi do të shkojë në zgjedhje të reja parlamentare.

“Nëse nuk do të arrijmë të zgjedhim president të ri, do të shkojmë sërish në zgjedhje, që do të jenë zgjedhjet e katërta në më pak se dy vite”, tha Kurti.

Ai i cilësoi zgjedhjet e reja si të panevojshme dhe të kushtueshme, duke theksuar se Kosova tashmë ka Kuvend dhe Qeveri të zgjedhur.

“Ne tashmë kemi kryetare të Kuvendit dhe kemi qeveri të zgjedhur dhe ky Kuvend mund t’i japë vendit president apo presidente. Duhet ta kuptojmë që në Kosovë nuk kemi zgjedhje presidenciale. Zgjedhjet e reja do të jenë sërish për Kuvend e për qeveri dhe jo për president, pasi zgjedhja e presidentit bëhet nga Kuvendi”, tha ai.

Kurti u bëri thirrje subjekteve politike që të kontribuojnë në funksionalizimin e Kuvendit, duke theksuar se përgjegjësia për miratimin e ligjeve dhe funksionimin e institucioneve është e përbashkët./Telegrafi/