Andonovski zbulon risinë e madhe: Letërnjoftimi dhe patenta digjitalizohen në tetor!

Qytetarët së shpejti do të mund të kenë dokumentet e tyre personale edhe në telefonin celular. Ministri i Transformimit Digjital, Stefan Andonovski, ka njoftuar zyrtarisht se gjatë muajit tetor do të promovohet aplikacioni i ri mobil m.Uslugi (m.Shërbime).

Lajmin ministri e bëri të ditur gjatë paraqitjes së tij në emisionin “Vesti Plus” në Kanal 5.

“Zyrtarisht mund të njoftoj se në tetor do të organizojmë një ngjarje ku do të promovojmë aplikacionin mobil m.Uslugi. Në të do të jenë të disponueshme versionet elektronike të letërnjoftimit dhe patentë-shoferit, si dhe dy shërbime elektronike për qytetarët”, deklaroi Andonovski.

Përmes aplikacionit m.Uslugi, qytetarët do të mund të kenë në një vend dokumentet e tyre personale në formë digjitale, si dhe të kenë qasje në shërbime të ndryshme elektronike të administratës shtetërore.

Qëllimi, sipas Ministrisë së Transformimit Digjital, është që shërbimet shtetërore të bëhen më të qasshme, më të shpejta dhe më të thjeshta për përdorim, drejtpërdrejt përmes telefonit celular.

Ministri Andonovski theksoi se gjatë periudhës së fundit është punuar intensivisht në çështjet që lidhen me sigurinë kibernetike, mbrojtjen dhe ruajtjen e të dhënave personale, si dhe shkëmbimin e tyre me Ministrinë e Punëve të Brendshme, e cila është pronare e këtyre të dhënave.

“Jemi në fazën përfundimtare të harmonizimit dhe nënshkrimit të protokollit për shkëmbimin e të dhënave, si dhe në fazën e testimit të aplikacionit. Para se aplikacioni të bëhet i disponueshëm për të gjithë qytetarët, duam të jemi të sigurt se sistemi është stabil, i sigurt dhe i thjeshtë për përdorim”, tha Andonovski.

Aplikacioni pritet të jetë i disponueshëm për shkarkim në App Store dhe Google Play, ndërsa versionin testues të tij deri më tani e kanë shkarkuar rreth 6.000 qytetarë.

Sipas Andonovskit, hapi i ardhshëm në procesin e transformimit digjital është që telefoni celular gradualisht të shndërrohet në një lloj portofoli digjital, përmes të cilit qytetarët do të mund të kenë qasje të sigurt dhe të thjeshtë në dokumentet personale dhe shërbimet e shtetit.