Zhelina “i lë pas” komunat shqiptare: Më e mira në transparencën buxhetore!

Komuna e Zhelinës renditet në mesin e komunave me transparencën më të lartë buxhetore në Maqedoninë e Veriut, sipas Indeksit të Transparencës Buxhetore për periudhën 2025/2026, të publikuar nga Qendra për Analiza Ekonomike (CEA), transmeton Zyrtare.net

Sipas të dhënave të hulumtimit, Zhelina ka marrë pikët maksimale – 16, duke u renditur në grupin e komunave me rezultatin më të lartë në vend.

Në këtë kategori, përveç Zhelinës, janë edhe Qendra, Pehçeva, Makedonski Brodi, Kriva Pallanka, Karposhi, Ilindeni, Dellçeva, Velesi, Valandova, Buteli, Manastiri, Shtipi dhe komuna të tjera.

Rezultati i Zhelinës është veçanërisht domethënës duke pasur parasysh se indeksi vlerëson qasjen e qytetarëve në dokumentet buxhetore, publikimin në kohë të buxheteve, llogarive përfundimtare dhe raporteve tremujore, transparencën tatimore, si dhe përfshirjen e publikut në proceset buxhetore.

Hulumtimi i CEA-së e konsideron përmirësimin e transparencës fiskale në nivel lokal si një nga shtyllat kryesore të qeverisjes së mirë, përgjegjësisë ndaj qytetarëve dhe menaxhimit më efikas të resurseve komunale.

Me rezultatin maksimal prej 16 pikësh, Zhelina del si një shembull pozitiv i transparencës në menaxhimin e financave publike, duke dëshmuar se informimi i qytetarëve dhe hapja e proceseve buxhetore mund të jenë pjesë e rëndësishme e funksionimit të një administrate lokale.

Hulumtimi gjithashtu ofron rekomandime për komunat me rezultate më të ulëta, me qëllim forcimin e integritetit fiskal dhe rritjen e besimit të qytetarëve dhe tatimpaguesve./ZYRTARE.net