Ohri përfiton 700.000 euro në vit nga dhënia me qira e plazheve

Rregullimi dhe shfrytëzimi i plazheve të Ohrit i sjell komunës së Ohrit dhe NP „Ohridski Komunalec“ të ardhura vjetore në total prej rreth 700.000 eurosh, mjete të cilat, sipas pushtetit lokal, kanë luajtur rol kyç në konsolidimin financiar të qytetit.

Kryetari i Ohrit, Kiril Pecakov, në një intervistë për podcastin „Veçer vo Ohrid so Landov i Vik“, të publikuar në portalin „Skopje1.mk“, sqaroi se aktualisht nuk bëhet fjalë për koncesione klasike për plazhet, por për një sistem të dhënies me qira të hapësirës për vendosjen e pajisjeve urbane. Ai theksoi se kjo mënyrë e menaxhimit krijon të ardhura që më pas investohen përsëri në qytet, përmes Komunës dhe ndërmarrjes publike.

„Nuk bëhet fjalë për koncesion klasik, por secili paguan për shfrytëzimin e plazhit. Komuna e Ohrit, së bashku me detyrimet që ka ndaj NP ‘Ohridski Komunalec’, në nivel vjetor ka të ardhura prej rreth 700.000 eurosh“, deklaroi Pecakov në intervistën për „Skopje1.mk“.

Sipas kryetarit të Ohrit, këto të ardhura kanë ndihmuar ndjeshëm në shlyerjen e borxheve të Komunës. Ai theksoi se organizimi dhe rregullimi i plazheve filloi pasi ato më parë ishin mbyllur, duke theksuar se ky ishte një hap i ndërgjegjshëm me qëllim të qartë për rimëkëmbjen financiare të komunës, përcjell Zhurnal.