Kontrolle të përforcuara për trotinetët elektrikë – janë regjistruar 965 shkelje

Pothuajse një mijë shkelje në pak më shumë se dy muaj tregojnë se rregullat për lëvizjen me trotinetë elektrikë ende nuk respektohen plotësisht.

Nga 18 maji deri më 31 korrik 2026, Sektori për Punë të Qarkullimit pranë MVR-së ka kryer kontrolle të përforcuara në të gjithë territorin e vendit, ku janë konstatuar gjithsej 965 shkelje nga ana e drejtuesve të trotinetëve elektrikë.

Pjesa më e madhe e shkeljeve, 519, kanë të bëjnë me lëvizje të parregullt, domethënë me vozitje në sipërfaqe të destinuara për këmbësorë, në vend të shtegut ose korsiës së biçikletave, siç parashikon Ligji për Sigurinë e Qarkullimit në Rrugë.

Shkeljet më të shumta janë regjistruar në zonën e SVR Bitola – 443, pasuar nga SVR Strumica me 112, SVR Shkup me 90, SVR Tetovë me 86, SVR Veles me 73, SVR Ohër me 59, SVR Kumanovë me 45 dhe SVR Shtip me 18 shkelje. Njësia mobile për sigurinë e qarkullimit ka konstatuar 39 shkelje shtesë.

Trotinetët elektrikë janë një formë gjithnjë e më e shpeshtë transporti, por përdorimi i tyre nënkupton edhe përgjegjësi. Respektimi i sipërfaqeve të përcaktuara për lëvizje nuk është vetëm detyrim ligjor, por bazë për sigurinë në qarkullim. MVR-ja njofton se kontrollet e përforcuara do të vazhdojnë, me qëllim të sigurisë më të madhe për të gjithë pjesëmarrësit në qarkullim.