Mimoza Musa në Bruksel: Integrimi i Maqedonisë së Veriut në BE është interes strategjik i qytetarëve

Deputetja e VLEN-it, Mimoza Musa, ka njoftuar se në kuadër të European Union Visitors Programme (EUVP), të cilin po e ndjek në Bruksel dhe Strasburg, ka zhvilluar një takim me eurodeputetin Vladimir Prebilič, me të cilin ka biseduar për procesin e integrimit evropian të Maqedonia e Veriut dhe perspektivën e Ballkani Perëndimor në Bashkimi Evropian, transmeton Zyrtare.

Sipas Musës, gjatë takimit ajo ka theksuar se anëtarësimi i Maqedonisë së Veriut në BE nuk është vetëm një aspiratë politike, por një përcaktim strategjik dhe interes i qytetarëve të vendit.

Ajo ka vlerësuar se Maqedonia e Veriut ka dëshmuar vazhdimisht përkushtim ndaj reformave, harmonizimit me standardet evropiane dhe ndërtimit të institucioneve demokratike, duke shtuar se tani është koha që Bashkimi Evropian të ruajë kredibilitetin e politikës së zgjerimit, duke e vlerësuar progresin e vendeve kandidate mbi bazën e meritës dhe kritereve të qarta.

Deputetja e VLEN-it ka theksuar gjithashtu se integrimi i Ballkanit Perëndimor në Bashkimin Evropian përbën një investim në zhvillimin ekonomik, si dhe një garanci për stabilitet, siguri dhe paqe afatgjatë në kontinent.

Në fund, Musa ka shprehur mirënjohje për mbështetjen, këshillat dhe përvojën e eurodeputetit Prebilič, duke shtuar se përmes dialogut, bashkëpunimit dhe vendosmërisë, Maqedonia e Veriut do t’i afrohet edhe më shumë anëtarësimit në familjen evropiane.