Trump shpall marrëveshjen me Iranin: “Hapet Ngushtica e Hormuzit, nafta do të rrjedhë sërish”

Presidenti amerikan Donald J. Trump ka njoftuar se marrëveshja me Republikën Islamike të Iranit është përfunduar, duke deklaruar se ka autorizuar hapjen e lirë të Ngushticës së Hormuzit për transportin detar ndërkombëtar.

Në deklaratën e tij, Trump theksoi se njëkohësisht është autorizuar edhe heqja e menjëhershme e bllokadës detare amerikane, duke i bërë thirrje anijeve tregtare nga e gjithë bota të rifillojnë lundrimin normal.

“Anijet e botës, ndizni motorët tuaj. Le të rrjedhë nafta!”, thuhet në mesazhin e publikuar nga presidenti amerikan.

Ky zhvillim konsiderohet me rëndësi të madhe për tregjet globale të energjisë, pasi Ngushtica e Hormuzit është një nga rrugët më strategjike për transportin e naftës dhe gazit në botë. Hapja e saj pritet të ndikojë në stabilizimin e furnizimeve energjetike dhe në lëvizjet e çmimeve në tregjet ndërkombëtare.