Saranda Imeri Stafai demanton akuzat e BDI-së: Edhe kongreset e tyre nisnin pa himn

Deputetja e VLEN, Saranda Imeri Stafai, ka reaguar përmes një postimi në rrjetet sociale ndaj kritikave të BDI lidhur me kongresin e VLEN-it.

Ajo ka akuzuar BDI-në për “standarde të dyfishta” dhe “amnezi kolektive”, duke rikujtuar se edhe në kongreset e mëhershme të BDI-së, sipas saj, nuk ka pasur intonim të himnit.

“Histeria që po shfaq BDI është për t’u brengosur. Amnezi kolektive apo standarde të dyfishta…? Ja kështu filloi Kongresi i IV i BDI-së, pa asnjë nishan të himnit. Ama atyre nuk u llogaritet?!!”, ka shkruar Imeri Stafai.

Në fund të reagimit, deputetja ka theksuar se dita e sotme është festive për VLEN-in, duke shtuar: “Mos na e prishni ditën — ne kemi festë. VLEN u bë 1️⃣”.