Emri më i ri i skenës politike, Bardhyl Hasanpapaj tregon pse kandidoi për deputet

Bardhyl Hasanpapaj, një jurist i shquar në Kosovë, për herë të parë do të jetë pjesë e garës zgjedhore për përfaqësim në Kuvendin e Kosovës.

Hasanpapaj, pjesë e listës së Vjosa Osmanit në Lidhjen Demokratike të Kosovës, ka treguar arsyet që e kanë shtyrë të merret me politikë.

I ftuar në emisionin VV Show me Vehbi Kajtazin e Visar Ymerin, Hasanpapaj ka thënë se e ka parë të domosdoshme t’i futet politikës, përkundër se nuk ka pasur ambicie e as nevojë.

“Mua nuk është që më duhet politika personalisht, por mendoj se unë i duhem politikës në këto momente. Për shkak se fatkeqësisht politika po shihet si burim i së keqes, burim i përçarjes, burim i linçimeve dhe etiketimeve dhe sikur të gjithë të rinjtë sikur largohen dhe frikësohen t’i afrohen politikës, mirëpo deshëm ose jo politika është ajo që organizon jetën të përditshme tonën përmes instituicioneve që do të duhej t’i shërbenin qytetarëve”, ka thënë mes të tjerash ai.

Hasanpapaj, i cili në këto zgjedhje garon me numrin 34 në listën e LDK-së, ka thënë se angazhimin e tij në politikë e sheh si detyrim moral dhe përgjegjësi.

“Nëse nuk përfshihemi atëherë do të jetë në dëm të qytetarëve. Kam hyrë me vullnet dhe dëshirë të mirë, pa asnjë ambicie personale ose nevojë personale. Përkundrazi, e shoh si detyrim moral e përgjegjësi duke e parë në çka po kalon Kosova dhe nëse qëndrojmë indiferent bëhemi pjesë të fajit. Do të mundohem me gjithë qenien time që të kontribuoj mirë dhe mbarë me aq sa mundem dhe po e them prapë nuk më duhet mua, besoj që i duhem politikës, dhe do ta bëjë maksimumin që ta dëshmojë këtë”, ka thënë Hasanpapaj.