Dikush sapo pagoi 9 milionë dollarë për një darkë ekskluzive me një dyshe të famshme!

Një person i paidentifikuar ka rënë dakord të paguajë 9,000,100 dollarë në ankand për të darkuar me miliarderin Warren Buffett dhe superyllin e basketbollit Stephen Curry në një aktivitet bamirësie për mbledhje fondesh.

Oferta fituese u bë në një ankand njëjavor në eBay që përfundoi të enjten.

Identiteti i fituesit nuk është bërë i ditur.

Buffett, Curry dhe gruaja e tij Ayesha Curry do t’i bashkohen fituesit dhe shtatë të ftuarve të tjerë të zgjedhur nga fituesi më 24 qershor në Omaha, Nebraska, ku ndodhet selia e konglomeratit të Buffett, Berkshire Hathaway.

Të ardhurat do të ndahen midis Glide Foundation dhe Eat. Learn. Play. Organizatat jofitimprurëse thanë se Buffett do të dyfishonte ofertën fituese për secilën, duke e çuar shumën totale të donacionit në rreth 27 milionë dollarë.

Glide është një organizatë jofitimprurëse në distriktin Tenderloin të San Franciskos që ndihmon të varfrit, të pastrehët dhe ata që luftojnë me varësinë.

Buffett mblodhi rreth 53.2 milionë dollarë për Glide në 21 ankande midis viteve 2000 dhe 2022./Indeksonline/