Agim Islami reagon para protestës studentore: Çfarë vlere ka provimi në shqip, kur të pafajshmit kalben në burgje?

Një ditë para protestës studentore për të drejtën e dhënies së provimit të jurisprudencës në gjuhën shqipe, ka reaguar edhe Agim Islami, i dënuar me burgim të përjetshëm në rastin “Alfa”, i cili prej vitesh pretendon pafajësinë e tij.

Në një status publik, Islami shpreh mbështetje për kërkesën që provimi të mbahet në gjuhën amtare, duke theksuar se kjo është një e drejtë legjitime dhe se gjuha është identitet dhe mjet për të kuptuar drejtësinë. Por, ai vendos theksin te ajo që e quan mungesë e drejtësisë reale në praktikë.

Sipas tij, nuk ka kuptim që studentët të japin provime për drejtësi në gjuhën shqipe apo në çfarëdo gjuhe tjetër, nëse në të njëjtën kohë njerëz të pafajshëm vazhdojnë të kalben nëpër burgje nga, siç thotë ai, “drejtësia selektive”.

“Para se të flisni për jurisprudencën në letër, duhet të flisni për drejtësinë në praktikë”, shkruan Islami, duke shtuar se “nuk ia vlen as provimi e as të merresh me drejtësi”, derisa në gjykata, sipas tij, “ligji i vetëm që zbatohet është paraja”.

Në reagimin e tij, ai përmend edhe rastin “Alfa”, të cilin e quan “18 vite padrejtësi”, duke përdorur hashtagun #LiriPërRastinAlfa dhe duke kërkuar sensibilizim për, siç thotë, të burgosurit e pafajshëm.