Shabani: Patriotizmi nuk dëshmohet me fjalë, por me veprime konkrete

Zëvendësministri i Mbrojtjes, Admir Shabani, ka reaguar me tone të ashpra përmes një postimi publik, duke akuzuar ish-zyrtarë dhe përfaqësues politikë për, siç thotë ai, “hipokrizi politike” në raport me çështjet që prekin shqiptarët.
Shabani thekson se ata që sot flasin më zëshëm për të drejtat dhe dinjitetin shqiptar, janë të njëjtët që, sipas tij, kanë heshtur kur kanë qenë në pushtet dhe nuk kanë ndërmarrë asnjë veprim konkret.
Ai sjell si shembull periudha të mëhershme në Ministrinë e Mbrojtjes, duke përmendur se deri më 19 maj 2025 zëvendësministre ishte Elfete Ismaili, ndërsa më herët me dikasterin kanë udhëhequr edhe Tiron Jajaga, si dhe ish-ministrat Talat Xhaferi dhe Fatmir Besimi.
“ Nëse kjo çështje është problematike sot, pse nuk është trajtuar atëherë kur kishit pushtetin dhe përgjegjësinë?”, pyet Shabani.
Sipas tij, arsyeja është e qartë: mungesa e prioritizimit të dinjitetit shqiptar përballë interesave për pushtet.
Në reagimin e tij, Shabani kritikon ashpër atë që e quan “shfrytëzim të ndjenjave kombëtare për përfitime politike”, duke shtuar se Marrëveshja e Ohrit nuk duhet të përdoret si slogan, por të zbatohet përmes veprimeve konkrete institucionale.
Në fund, ai bën thirrje që të shmanget, siç shprehet, “patriotizmi selektiv”, duke kërkuar përgjegjësi nga ata që, sipas tij, nuk kanë vepruar kur kanë pasur mundësinë.