Fëmijët e humbur të Gazës!

Kriza e fëmijëve të zhdukur në Gaza, është shndërruar në një nga tragjeditë më të rënda humanitare që nga tetori i vitit 2023.

Ndërsa bombardimet vazhdojnë dhe shkatërrimi ka mbuluar qytete të tëra, mijëra prindër mbeten të bllokuar në një cikël të pafund ankthi, të bllokuar midis shpresës për gjetjen e fëmijëve të tyre gjallë dhe dëshpërimit të humbjes së pazyrtarizuar.

Sipas të dhënave aktuale, numri i fëmijëve fati i të cilëve nuk dihet i kalon 2.900. Ekspertët e Qendrës Palestineze për të Zhdukurit vlerësojnë se rreth 2.700 prej tyre ndodhen ende nën rrënojat e ndërtesave të shembura.

Pamundësia për të futur makineri të rënda dhe sulmet e vazhdueshme nga ushtria izraelite kanë bërë që ekipet e shpëtimit ta kenë të pamundur nxjerrjen e trupave, duke i shndërruar shtëpitë e dikurshme në varre masive të pashënuara.

Përveç atyre që mbetën nën rrënoja, qindra fëmijë të tjerë janë zhdukur në rrethana të paqarta. Uria e skajshme i detyroi shumë të mitur të merrnin përsipër rreziqe vdekjeprurëse, si mbledhja e druve apo pritja e kolonave me ndihma në zona pranë pozicioneve ushtarake izraelite.

Në këto pika, raportohet se shumë fëmijë janë ndaluar ose janë zhdukur pa lënë gjurmë. Një rast tronditës është ai i Ibrahim Abu Zaher, pesëmbëdhjetë vjeç, i cili u zhduk në korrik 2025 gjatë përpjekjes për të siguruar ushqim.

Ndonëse dëshmitarët sugjerojnë se ai u ndalua nga njësitë ushtarake dhe u pa në qendrën e paraburgimit Sde Teiman, emri i tij nuk figuron në asnjë listë zyrtare. Dukuria e “zhdukjes me force” konsiderohet krim kundër njerëzimit sipas ligjit ndërkombëtar, i cili detyron palët të zbulojnë vendndodhjen e të ndaluarve.

Vuajtja e nënave si Majdal Saadallah pasqyron realitetin e mijëra familjeve. Ajo kthehet vazhdimisht te rrënojat ku mbeti i varrosur djali i saj tetëvjeçar, Ahmed, duke gjetur vetëm “heshtje dhe pluhur”.

Për këto familje, mungesa e një certifikate vdekjeje apo e një varrimi dinjitoz, do thotë që zija nuk mund të mbyllet kurrë. Dhe kjo krizë po thellohet dita-ditës. Humbja e fëmijëve në Gaza nuk lidhet më vetëm me shpërthimet e drejtpërdrejta, por me një sistem të tërë pasigurie ku vetë mbijetesa është bërë kurth.

Pa një ndërhyrje ndërkombëtare dhe mekanizma të qartë kërkimi, fati i këtyre fëmijëve rrezikon të mbetet një plagë e hapur, duke lënë një brez të tërë të humbur nën rrënoja ose në burgje sekrete, pa asnjë përgjigje për familjet palestineze që presin në dëshpërim. /tesheshi.com/