Dauti: Bashkëpunimi doganor me Greqinë sjell siguri më të lartë dhe qarkullim më të shpejtë të mallrave

Zv. drejtori i Doganave, Mustafa Dauti, ka njoftuar për zhvillimin e një takimi bilateral ndërmjet Drejtorive të Doganave të Republika e Maqedonisë së Veriut dhe Republika e Greqisë, me fokus forcimin e bashkëpunimit ndërinstitucional dhe avancimin e proceseve doganore.

Sipas Dautit, bashkëpunimi i ngushtë mes dy drejtorive sjell përfitime konkrete për ekonomitë e të dy vendeve, duke rritur sigurinë dhe përshpejtuar qarkullimin e mallrave në pikat kufitare.

Ai theksoi se prioritetet e përbashkëta përfshijnë zgjerimin e korridoreve të gjelbra në të gjitha pikat kufitare, shkëmbimin e praktikave më të mira, forcimin e kontrolleve dhe hetimeve, si dhe rritjen e shkëmbimit të të dhënave në kohë reale.

Mes tjerash, Dauti bëri të ditur se bashkëpunimi është i orientuar drejt modernizimit, digjitalizimit dhe harmonizimit me standardet e Bashkimit Evropian, duke kontribuar drejtpërdrejt në lehtësimin e tregtisë dhe përshpejtimin e integrimit në tregun e vetëm të BE-së.