VAR po i mërzit tifozët e futbollit…

Futbolli po përballet aktualisht me një krizë ekzistenciale që nuk buron nga mungesa e talentit, por nga tepria e teknologjisë. Siç vëren Henry Mance në analizën e tij për “Financial Times”, saktësia e gjyqtarëve është në nivelet më të larta historike, por kjo nuk ka sjellë lumturi për tifozët në shkallët e stadiumit.

Përkundrazi, teknologjia VAR (Video Assistant Referee) po e kthen “lojën e bukur”në një proces steril dhe legalist. Problemi kryesor nuk është saktësia, por kostoja emocionale e saj.

Sipas “Financial Times”, autoritetet e futbollit dështuan të kuptonin se duke i dhënë përparësi absolute saktësisë, ato po sakrifikonin vlerat që e bëjnë këtë sport unik: shpejtësinë, thjeshtësinë dhe spontanitetin.

Sot, tifozët nuk guxojnë më të festojnë një gol në mënyrë refleksive. Ata qëndrojnë në pritje të një sinjali nga dhoma e videove, duke vrarë pikërisht atë moment kulminant që i jep kuptim futbollit.

Mance bën një krahasim interesant, duke e quajtur VAR-in një shëmbëlltyrë të rreziqeve të përparimit teknologjik. Ai e krahason këtë fenomen me aplikacionet e takimeve online ose makinat vetë-drejtuese: teknologjia premton të zgjidhë një problem (siç është mungesa e saktësisë), por në rrugë e sipër ndryshon rrënjësisht natyrën e aktivitetit njerëzor, duke e bërë shpesh atë më pak të këndshëm.

Një sondazh i cituar në artikull, tregon se dy të tretat e tifozëve mendojnë se VAR e ka bërë futbollin më pak tërheqës, edhe pse pranojnë se ai bën një punë të mirë në detyra teknike specifike.

Një tjetër pikë kritike që ngre artikulli në “Financial Times”, është intoleranca jonë ndaj gabimeve të makinave. Ndërsa gabimi njerëzor i një arbitri dikur pranohej si pjesë e dramës së lojës, dështimi i teknologjisë ose vonesat e gjata prej disa minutash për të marrë një vendim “të saktë”, përjetohen si një dështim moral.

Pra futbolli po e humb “arratisjen nga realiteti”, dhe po i ngjan gjithnjë e më shumë një deklarate tatimore apo një salle gjyqi. Në fund, analiza sugjeron se progresi nuk mund të ndalet, por duhet të rregullohet.

Përdorimi i një sistemi apelimi, i ngjashëm me lojën e kriketit, mund t’ia kthejë pushtetin njerëzve dhe ta bëjë teknologjinë pjesë të garës, dhe jo thjesht një ndërhyrje të jashtme që mbyt emocionin. Pa këto ndryshime, thekson Mance, futbolli rrezikon të mbetet një sport teknikisht perfekt, por shpirtërisht i vdekur.