Struga drejt së ardhmes së gjelbër: Vendosen stacione moderne për karikimin e automjeteve elektrike

Komuna e Strugës ka pranuar një donacion të rëndësishëm nga firma Tehno-Dom, i realizuar me mbështetjen e qytetarit Nermin Rexhoski, duke shënuar një hap konkret drejt promovimit të transportit ekologjik dhe zhvillimit të infrastrukturës moderne në qytet.
Donacioni përfshin aparate Adria Power, të destinuara për karikimin e automjeteve që funksionojnë me bateri elektrike. Këto stacione karikimi do të jenë në shërbim të qytetarëve të Strugës dhe vizitorëve, dhe do të mund të përdoren përmes kartelave, në mënyrë të thjeshtë dhe të sigurt.
Me këtë iniciativë, Struga forcon angazhimin e saj për zhvillim të qëndrueshëm, mbrojtjen e mjedisit dhe përmirësimin e cilësisë së jetës së qytetarëve.
Komuna e Strugës shpreh mirënjohje të sinqertë për këtë kontribut të vlefshëm dhe inkurajon iniciativa të ngjashme që ndikojnë pozitivisht në të ardhmen e qytetit.