Shtëpia e Bardhë thotë se Trumpi do ta tërheqë ShBA-në nga dhjetëra organizata ndërkombëtare

Presidenti i Shteteve të Bashkuara, Donald Trump, të mërkurën nënshkroi një shpallje me të cilën Shtetet e Bashkuara do të tërhiqen nga 35 organizata që nuk janë pjesë e Kombeve të Bashkuara dhe nga 31 entitete të OKB-së që “operojnë në kundërshtim me interesat kombëtare të ShBA-së”, tha në një deklaratë Shtëpia e Bardhë.

Shtëpia e Bardhë nuk e publikoi listën e këtyre organizatave, por tha se ato promovojnë “politika radikale klimatike, qeverisje globale dhe programe ideologjike që bien ndesh me sovranitetin dhe fuqinë ekonomike të ShBA-së”, raporton agjencia e lajmeve “Reuters”.

Në deklaratë, Shtëpia e Bardhë tha se kjo lëvizje është rezultat i një rishikimi të të gjitha organizatave, konventave e traktateve ndërqeveritare ndërkombëtare në të cilat Shtetet e Bashkuara janë anëtare ose palë.

“Këto tërheqje do t’i japin fund financimit dhe përfshirjes së taksapaguesit amerikan në entitete që çojnë përpara agjenda globaliste mbi prioritetet e ShBA-së, ose që adresojnë çështje të rëndësishme në forma joefikase ose joefektive, në mënyrë që dollarët e taksapaguesit amerikan të alokohen më së miri në mënyra të tjera për t’i mbështetur misionet përkatëse” – tha Shtëpia e Bardhë.

Shtëpia e Bardhë nuk u përgjigj menjëherë, kur iu kërkuan hollësi të mëtejme dhe një listë e këtyre organizatave.

Që nga fillimi i mandatit të dytë para një viti, Trumpi është përpjekur që t’i zvogëlojë fondet amerikane për OKB-në, e ka ndërprerë angazhimin e Uashingtonit me Këshillin e OKB-së për të Drejtat e Njeriut si dhe e ka tërhequr vendin nga agjencia kulturore e OKB-së, UNESCO.

Presidenti amerikan gjithashtu ka njoftuar plane për t’i tërhequr Shtetet e Bashkuara nga Organizata Botërore e Shëndetësisë dhe marrëveshja e Parisit për klimën./Nacionale