Durmishi: NVM-të janë shtylla e ekonomisë, Strategjia 2025–2030 hap kapitull të ri zhvillimi

Ministri i Ekonomisë dhe Punës, Besar Durmishi, prezantoi sot zyrtarisht Strategjinë Kombëtare për Ndërmarrjet e Vogla dhe të Mesme 2025–2030, duke theksuar se kjo strategji vendos NVM-të në qendër të politikave zhvillimore të vendit.

“NVM-të përbëjnë rreth 99 për qind të të gjitha ndërmarrjeve dhe sigurojnë punësim për pjesën më të madhe të qytetarëve. Çdo sukses i tyre është sukses për ekonominë dhe shoqërinë në tërësi”, deklaroi ministri Durmishi.

Ai theksoi se Strategjia synon krijimin e një mjedisi më konkurrues për bizneset, përmirësimin e qasjes në financa, si dhe përshpejtimin e tranzicionit të gjelbër dhe digjital, në përputhje me standardet e Bashkimit Evropian.

Sipas Durmishit, Ministria e Ekonomisë dhe Punës do të ketë rol udhëheqës në zbatimin e Strategjisë, por suksesi do të varet nga bashkëpunimi i ngushtë me institucionet, sektorin privat, odat ekonomike dhe partnerët ndërkombëtarë.

“Po ndërtojmë një ekonomi moderne, konkurruese dhe evropiane, ku sipërmarrësit kanë mbështetje reale dhe kushte për zhvillim”, përfundoi ai.