Personi i Vitit te Time, jo një por disa!

Për vitin 2025, revista Time nuk zgjodhi një person të vetëm për titullin e saj të Personit të Vitit. Në vend të kësaj, ajo i dha nderin “arkitektëve” të inteligjencës artificiale, duke njohur ndikimin e shpejtë të teknologjisë dhe kompanive që e zhvillojnë atë.

Apertura e revistës paraqet liderë të industrisë, përfshirë CEO-n e Nvidia-s, Jensen Huang; CEO-n e Meta-s, Mark Zuckerberg; pronarin e X, Elon Musk dhe “ndrikullën” e IA-së, Fei-Fei Li.

Përzgjedhja, thonë ekspertët, nënvizon se sa shpejt IA po e transformon shoqërinë. Rritja shpërthyese që pasoi lançimin e ChatGPT në fund të vitit 2022 vazhdon, me OpenAI që raporton se chatbot tani përdoret nga rreth 700 milionë njerëz çdo javë.

Kompanitë e mëdha të teknologjisë po investojnë miliarda në zhvillimin e IA-së dhe infrastrukturës së saj në një garë për të qëndruar përpara konkurrentëve të tyre.

Viti 2025 ishte viti kur potenciali i plotë i inteligjencës artificiale u shfaq me vrull dhe kur u bë e qartë se nuk do të ketë kthim prapa.

Analisti i Forrester, Thomas Hison, tha se viti 2025 mund të konsiderohet si një “pikë kthese” për frekuencën me të cilën teknologjia hyn në jetën e përditshme të njerëzve. “Shumica e njerëzve e përdorin atë pa e kuptuar fare”, tha ai, duke vënë në dukje se tani po integrohet në pajisje, softuerë dhe shërbime me një ritëm më të shpejtë se përhapja e internetit ose telefonave celularë.

Shumë po drejtohen te asistentët e bisedave në vend të motorëve të kërkimit për të planifikuar udhëtime, për të zgjedhur dhurata ose për të zbuluar receta. Të tjerë, megjithatë, po zgjedhin të qëndrojnë larg, të shqetësuar për konsumin e energjisë, të dhënat e trajnimit dhe ndikimin në punën e tyre.

Nick Kairinos, themelues dhe CEO i Fountech AI, e quajti çmimin “një vlerësim të ndershëm” të ndikimit të teknologjisë, por vuri në dukje se “njohja nuk duhet të ngatërrohet me gatishmërinë”. Ai paralajmëroi se “IA mund të bëhet ende një shpëtim ose një plagë për njerëzimin”.

Siç tha ai, ne jemi ende në fazat e hershme të krijimit të sistemeve që janë të besueshme, të përgjegjshme dhe të përputhura me vlerat njerëzore. “Për ata prej nesh që po e zhvillojnë këtë teknologji, përgjegjësia është e madhe”, përfundoi ai. /tesheshi.com/