Lazim Destani priti në Tetovë ish-presidentin e Shqipërisë, Rexhep Meidani: Biseda të ngrohta e vëllazërore

Pronari i kompanisë “Ecolog”, Lazim Destani, priti dje në zyrat qendrore të kompanisë në Tetovë ish-presidentin e Republikës së Shqipërisë, Rexhep Meidani, i shoqëruar nga i biri, Denion Meidani, ambasador i Shqipërisë në Maqedoninë e Veriut.

Takimi u zhvillua në një atmosferë miqësore dhe vëllazërore, ku bashkëbiseduesit ndanë kujtime dhe reflektime nga takimet e mëhershme, duke riafirmuar respektin dhe vlerësimin e ndërsjellë.

Me këtë rast, Destani vlerësoi figurën e presidentit Meidani si një personalitet kombëtar me kontribut të shtrirë në të gjithë hapësirën shqiptare. Krahas rolit të tij të rëndësishëm në zhvillimin e demokracisë dhe udhëheqjen e shtetit shqiptar, Meidani është vlerësuar edhe për kontributin e tij të çmuar akademik, veçanërisht në ngritjen dhe zhvillimin e Universitetit të Tetovës, si dhe më herët në themelimin dhe konsolidimin e Universitetit të Prishtinës.

“Përmes bisedave të ngrohta e vëllazërore, çaste të bukura kaluam duke i kujtuar edhe takimet e mëhershme tonat së bashku. Presidenti Meidani është nga ato figura kombëtare që kontributin e tyre e kanë shtrirë në gjithë hapësirën shqiptare. Krahas rolit të tij në zhvillimin e demokracisë dhe udhëheqjes së vendit, ai është ndër ata profesorë që kanë dhënë kontribut të pazëvendësueshëm si në ngritjen e Universitetit të Tetovës ashtu dhe shumë kohë më parë në ngritjen e Universitetit të Prishtinës”, shkroi Destani.

Takimi u cilësua si një moment i veçantë respekti dhe mirënjohjeje për kontributin shumëdimensional të presidentit Meidani në jetën politike, arsimore dhe kombëtare shqiptare.