VLEN dënon gjuhën seksiste të gazetarit Nevrij Ademi mbi raportimet mbi vdekjen tragjike të Daorsa Spahiut

Koalicioni VLEN ka reaguar ashpër ndaj komenteve të gazetarit të portalit “Tetova Sot”, Nevrij Ademi, lidhur me raportimet mbi vdekjen tragjike të Daorsa Spahiut në televizionin Klan Kosova.

Në reagimin e VLEN-it thuhet se gjuha e përdorur nga gazetari është “denigruese, ofenduese dhe paragjykuese”, ndërsa komentet e tij përbëjnë “shkelje flagrante të Kodit Etik të Gazetarëve”.
“Përdorimi i termave denigruese, si përshkrimi se ajo ‘ka qenë e lëvizshme’, apo insinuatat për ‘përdorim të lëndëve narkotike’, përbëjnë jo vetëm shkelje flagrante të Kodit Etik të Gazetarëve, por edhe një sulm në baza gjinore ndaj një vajze që tragjikisht humbi jetën”, thuhet në reagim.

Koalicioni kërkon nga Shoqata e Gazetarëve të Maqedonisë (SHGM), Këshilli për Etikë në Media, si dhe nga “të gjitha redaksitë serioze”, që të reagojnë ndaj këtij rasti, i cili “dëmton rëndë imazhin e gazetarisë në vend dhe shkel çdo standard profesional”.

VLEN kritikon ashpër qasjen e gazetarit, duke theksuar se në vend që të informojë me ndjeshmëri dhe përgjegjësi për një ngjarje tragjike, ai ka “zgjedhur të nxisë paragjykime dhe të stigmatizojë vajzat dhe gratë”.

“VLEN qëndron fuqishëm në mbrojtje të dinjitetit të grave dhe vajzave dhe kërkon që drejtësia të veprojë ndaj çdo forme të linçimit publik, diskriminimit dhe gjuhës së urrejtjes në media”, përfundon reagimi.

Në fund, koalicioni u shpreh ngushëllime familjarëve të Daorsa Spahiut, me dëshirën që “raste të tilla të mos përsëriten kurrë”.