Më kërkuan të hiqja komentin për….

Arjan Konomi, një nga figurat më të njohura të opinionit publik në Shqipëri, ka bërë një rikthim të fuqishëm në vëmendjen e mediave me një rrëfim të sinqertë dhe të drejtpërdrejtë mbi largimin e tij nga Top Channel.

I ftuar në emisionin e Arbana Osmanit, “Mirëmbrëma Yje”, Konomi ka ndarë me publikun arsyet e vërteta që qëndrojnë pas këtij largimi, duke konfirmuar zërat që qarkullonin prej kohësh në lidhje me situatën e tij në televizion.

Gjatë intervistës, ai zbuloi se gjithçka nisi nga një koment kritik që kishte bërë publikisht për opinionistët e “Big Brother VIP”, Zhaklin Lekatari dhe Arbër Hajdari, të cilët ai i kishte vlerësuar si të papërshtatshëm për formatin e emisionit.

Çfarë ndodhi pas këtij komenti?

Konomi tregoi se pas postimit të tij, ai mori një telefonatë nga drejtuesit e televizionit, të cilët i kërkuan të hiqte komentet e tij. Kjo situatë e detyroi atë të përballet me një zgjedhje të vështirë: të mbante mendimin e tij apo të ruante vendin e punës.

“Unë u largova nga Top Channel për një koment që bëra në lidhje me opinionistët e Big Brother. Më morën drejtuesit e televizionit dhe më thanë ‘Hiqe’. Unë i thashë: ‘E kam postuar dhe nuk e heq’. Më bënë pezullim dhe më thanë që nëse nuk e heq, do largohem. Okej i thashë, largohem unë. Unë u largova nga Top Channel për një postim që nuk e hoqa,” – shprehet Arjan Konomi përballë Arbana Osmanit.

Çfarë shkruante Konomi në postimin që i kushtoi vendin e punës?

Kujtojmë se ky postim kritik i Konomit kishte të bënte me nivelin e debateve në studio, ku ai shprehu zhgënjimin e tij për mënyrën se si opinionistët po e trajtonin formatin.

Ai e përshkroi situatën si një “shije të hidhur” që po e ndjente nga debatet e zhvilluara.

Postimi i tij viral, që ai refuzoi ta fshinte, përmbante një analizë të thellë mbi mediokritetin në televizion, duke e cilësuar atë si një problem më të madh se injoranca.

Ai shprehej se diskutimet ishin të ngjashme me ato që ndodhnin në një lokal periferik, duke i dhënë një dimension të ri kritikës së tij.

“Teksa i dëgjoja, më dukus sikur po shikoja njerëz të rëndomtë, mediokër, që diskutojnë në një lokal periferie dhe japin e marrin, thonë e stërthonë, e kthejnë e debatojnë në mënyrën më vulgare në një spektakël. Mediokriteti vret më shumë se injoranca.”

Ky qëndrim parimor i Konomit duket se i ka kushtuar atij karrigen e tij në “Për’puthen”, por siç thotë ai vetë, nuk u pendua që mbrojti mendimin e tij të lirë.

Kjo ngjarje na kujton rëndësinë e lirisë së shprehjes në media dhe pasojat që mund të sjellë ajo në karrierën e individëve.