Ish-kryetari Ahmeti sqaron krizën e Trafikut Urban: Deklaratat se lirimi nga pagesa nuk ndikon në financat janë të pavërteta

Ish-kryetari i Prishtinës, Shpend Ahmeti, ka reaguar lidhur me debatin për funksionimin e Trafikut Urban dhe ndikimin e vendimeve komunale mbi financat e ndërmarrjes publike. Në një shkrim të gjatë, Ahmeti ka rikujtuar modelin financiar të transportit publik që, sipas tij, është ndërtuar gjatë mandatit të tij dhe funksionon vetëm nëse zbatohet në tërësi.

Ai ka theksuar se për të siguruar kreditë për 51 autobusët e rinj, ishte e domosdoshme që Trafiku Urban të garantonte të hyra të mjaftueshme për shlyerjen e kredisë. Për këtë arsye, modeli është ndërtuar në mënyrë që Komuna e Prishtinës të paguajë shërbimin e transportit publik për çdo kilometër të realizuar, pavarësisht fitimit apo numrit të udhëtarëve.

Ahmeti ka shtuar se transporti publik është interes publik, dhe linjat që nuk sjellin fitim, si ato në zonat rurale të Gollakut, kanë vlerë për komunitetin: “Aty ku Trafiku Urban nuk ka interes financiar, komuna ka interes publik”, ka thënë ai.

Sipas ish-kryetarit, llogaritja e kostove bazohet në një formulë të qartë: kostoja për kilometër minus të hyrat nga biletat përkthehet në faturën mujore që i paguhet ndërmarrjes nga komuna. Prandaj, deklaratat se lirimi nga pagesa nuk ndikon në financat janë të pavërteta.

“Ne kemi liruar pensionistët nga pagesa, por për secilin prej tyre komuna ka paguar. Nuk mund të ketë lirime pa mbulim financiar. Nuk mund të lirosh në fushatë dhe tre ditë më pas të mbetesh pa të holla”, ka theksuar Ahmeti.

Ai ka theksuar se transport publik pa subvencionim nuk ekziston në asnjë qytet modern, duke shtuar se linjat me vetëm dy udhëtarë janë të domosdoshme për të nxitur qytetarët të përdorin autobusët dhe jo veturat.

Ahmeti ka rikujtuar gjithashtu se modeli i krijuar në Prishtinë është përdorur si shembull nga Banka Evropiane për Rindërtim dhe Zhvillim (BERZH), e cila ka lënë të gatshme një marrëveshje për 30 autobusë të rinj, përfshirë 8 elektrikë, bazuar në performancën e kredisë së parë.

“Dëmi është i madh për qytetarët. Faji është jetim. Përgjegjësia është e përbashkët. Lehtë është me prish, vështirë është me ndreq diçka”, ka përfunduar Ahmeti.