Qentë blu të Çernobilit

Pothuajse 40 vjet pas një prej katastrofave më të mëdha bërthamore në histori, zona përreth termocentralit bërthamor të Çernobilit ende fsheh pamje të pabesueshme dhe shqetësuese.

Gjatë tetorit të këtij viti, punonjësit humanitarë nga organizata Dogs of Chernobyl, e cila vepron brenda Fondit Clean Futures, zbuluan diçka që i shokoi, tre qen me një ngjyrë të pazakontë, blu.

Këta qen jetojnë në zonën e braktisur rreth Çernobilit, ku natyra ka pushtuar zonën pas evakuimit të popullsisë. Ekipi, i cili ka punuar në zonë për vite me radhë për të kastruar, sterilizuar dhe vaksinuar qentë, hasi një pamje të pazakontë gjatë një vizite të rregullt.

“Duhet t’ju tregojmë për një përvojë unike. Aktualisht jemi në terren, duke kapur qen për sterilizim, kur hasëm tre qen që ishin plotësisht blu. Nuk jemi të sigurt se çfarë po ndodh saktësisht. Vendasit po na pyesin pse janë blu, sepse nuk ishin kështu javën e kaluar. Me shumë mundësi kanë rënë në kontakt me ndonjë kimikat”, tha ekipi i Qenve të Çernobilit.

Sipas tyre, qentë duken të shëndetshëm dhe shumë aktivë, por deri më tani nuk ka qenë e mundur të kapen për analiza dhe të përcaktohet shkaku i këtij ndryshimi të pazakontë.

Blue #dogs were spotted near the #Chernobyl #nuclear power plant by a rescue group recently. They were descendants of pets abandoned after the 1986 disaster. Tests are underway to find out what caused the unusual color. #animals #Ukraine pic.twitter.com/pxPNc87KdP

— Shanghai Daily (@shanghaidaily) October 28, 2025

Kujtojmë se në vitin 2017, Fondi i të Ardhmes së Pastër nisi programin Qentë e Çernobilit me qëllim kujdesin për pasardhësit e kafshëve shtëpiake që u braktisën pas evakuimit të banorëve në prill të vitit 1986. Sot, vlerësohet se rreth 700 qen jetojnë në zonë, të cilëve vullnetarët u ofrojnë kujdes shëndetësor bazë dhe ushqim çdo vit.

Ekipi publikoi foto të qenve blu, të cilat u bënë në tetor 2025, në rrjetet e tyre sociale dhe shkaktuan reagime të shumta në të gjithë botën, shkruan portali sllovak Novy Čas. /tesheshi.com/