Përgjaket rëndë drejtësia shqiptare: ky gjykatës i Apelit vritet në sallën e gjyqit

Nuk kishte ndodhur kurrë më parë në Shqipëri. Në Gjykatën e Apelit në Tiranë, gjyqtari Astrit Kalaja u qëllua për vdekje nga shtetasi  Elvis Shkambi, plumbat e të cilit plagosën dhe dy persona të tjerë, babë e bir, Rakip dhe Ervis Kurtaj.

“Rreth orës 15:40, në ambientet e Gjykatës së Apelit të Juridiksionit të Përgjithshëm Tiranë, gjatë një procesi gjyqësor, dyshohet se shtetasi E. Sh., 30 vjeç (palë në proces) ka qëlluar me armë zjarri drejt gjyqtarit, shtetasit A. K., dhe shtetasve R. K., 65 vjeç dhe E. K., 45 vjeç, atë e bir (pala tjetër në proces).  

Si pasojë ka humbur jetën shtetasi A. K. dhe janë plagosur shtetasit R. K. dhe E. K, të cilët janë jashtë rrezikut për jetën”, informoi Policia e Tiranës.

Forca të shumta policie mbërritën në vendin e ngjarjes dhe arrestuan autorin Elvis Shkambi, 30 vjeç, duke i sekuestruar edhe armën e krimit. Policia e Tiranës informoi se autori ka nxjerrë armën në sallën e gjyqit dhe ka qëlluar në drejtim të gjyqtarit dhe dy të tjerëve. Një grup hetimor do të punojnë për zbardhjen e plotë të ngjarjes, ndërsa në vendin e ngjarjes mbërritën edhe dy prokurorë të SPAK.

Pararakisht, thuhet se autori po humbiste një gjyq për pronën, nga ato që zgjasin me vite. Madje ai e kishte denoncuar historinë edhe në një emision investigativ.

Sipas pretendimit të tij vite më parë, ai thoshte se kishte fituar në Shkallën e Parë, ndërsa Apeli ia ka kthyer për rigjykim, pasi në dosje i mungonin dy proces-verbale dhe akti i ekspertimit.

Ai pretendon se pala tjetër me dokumente të falsifikuara vazhdon të qëndrojë në ndërtesën të cilën e prendon.

“E qëllova sepse po humbisja një gjyq. Isha korrekt me letrat e mia”, ka dëshmuar autori Shkëmbi në Komisariat, sipas burimeve të ABC News.

Po kush ishte gjykatësi i vrarë?

Astrit Kalaja ishte anëtar i zgjedhur për të tretën herë në Kolegjin Zgjedhor.

Ai ka lindur në qytetin e Shkodrës dhe u diplomua në vitin 1993 në fakultetin e Drejtësisë. Sapo mbaron studimet me titullin “Jurist”, emërohet në detyrën e gjykatësit në rrethin e Shkodrës.

Shtatë vitet e fundit ushtron detyrën e anëtarit të gjykatës së Apelit, çka e dërgon në 18 numrin e viteve që e lidhin me sistemin e drejtësisë. Në kuadër të procesit të Vettingut, ai u rikonfirmua në detyrë dhjetor të 2019. /tesheshi.com/