Hamasi pranon propozimin e Trumpit për armëpushim

Hamasi ka dorëzuar përgjigjen e tij zyrtare ndaj nismës së paqes të propozuar nga presidenti amerikan, Donald Trump, lidhur me konfliktin në Gaza, pas konsultimeve me drejtuesit, fraksionet dhe ndërmjetësit rajonalë.

Në deklaratë, Hamas shprehet se vlerëson përpjekjet arabe, islame, ndërkombëtare dhe ato të SHBA-ve për t’i dhënë fund luftës, për të siguruar dërgimin e ndihmave humanitare, për të refuzuar pushtimin dhe për të parandaluar zhvendosjen e palestinezëve.

Lëvizja ka bërë të ditur se është dakord të lirojë të gjithë të burgosurit izraelitë—të gjallë apo të vdekur—sipas formulës së shkëmbimit të parashikuar në propozimin e Trump, sapo të krijohen “kushtet në terren”.

Hamas theksoi se është i gatshëm të hyjë në negociata të menjëhershme mbi këtë çështje.

Po ashtu, Hamas ka konfirmuar se është i gatshëm të dorëzojë administrimin e Gazës tek një trupë teknokrate palestineze, mbi bazën e një konsensusi kombëtar dhe me mbështetje arabe e islame.

Megjithatë, grupi theksoi se çështjet e tjera thelbësore të planit të Trump – si e ardhmja afatgjatë e Gazës dhe të drejtat e palestinezëve – duhet të trajtohen brenda një kornize më të gjerë kombëtare palestineze dhe në përputhje me të drejtën ndërkombëtare.

Ky reagim sinjalizon një hap të rrallë hapjeje nga Hamas ndaj një propozimi të ndërmjetësuar nga SHBA, por njëkohësisht lë pezull pyetjet më të ndërlikuara politike, duke përgatitur terrenin për negociata të vështira në javët në vijim.